Charter Document - 02184070
| Charter Number: | 02184070 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Letter |
| Date: | 1140 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Ego frater Petrus humilis Cluniacensis abbas nota facio legentibus ea que sequuntur Comes Rodulfus de Perrona filius Hugonis magni fratris Philippi regis Francorum magnus amicus et benefactor exstitit hujus in qua omnipotenti Deo servire optamus sancte Cluniacensis ecclesie Hic post reliqua bona opera sua quibus Deum sibi propitiare dum incolumis viveret laborabat jam infirmus et morti proximus precedentibus aliquid majus adjunxit Nam monasterio de Crespeio quod antiquitus in eodem Crespeii castro constructum fuerat et Cluniacensi ecclesie subditum erat tam in terris quam in terrarum reditibus tanta largitus est ut redditus anni terrarum illarum mille solidorum quantitatem excederent Preter hec et multa alia que diversis ad Cluniacum pertinentibus monasteriis delegavit etiam ipsi Cluniacensi monasterio quingentas argenti marcas jure testamentario donavit Que ipso jam vita exempto paucis post diebus Cluniacum allate sunt et Cluniacensi conventui publice in capitulo presentate Nolentes ergo immo vitantes tantis beneficiis ex toto apparere ingrati communi consilio et precibus precipimus ei duo tricenaria fieri tres missas ab uno quoque sacerdotum cantari ter septem penitentiales psalmos a cunctis aliis non sacerdotibus dici per universa monasteria ad Cluniacum pertinentia ubi ordo tenetur tricenaria celebrari ab aliis sacerdotibus tricenaria non facientibus duas missas absque exceptione aliqua celebrari Super hec omnia quod raro cuilibet conceditur datum est ei et anniversarium solemne sicut uni post imperatores et reges de majoribus amicis et benefactoribus nostris Ut autem sciatur cujusmodi sit hoc anniversarium die qua illud celebrandum est fiet pro eo generale officium in conventu cum missa similiter publica fratres universi sacerdotalis ordinis Cluniaci morantes eadem die missam pro ipsius salute celebrabunt alii psalmum Miserere mei Deus dicent et tredecim pauperes reficientur Annuale insuper missarum hoc est anno integro quotidiana missa pro eo celebrabitur Facta sunt ista ut omnipotens miserator per immensam misericordiam suam ejus misereatur et a sorte impiorum ereptum eum numero suorum associet et felicis ac sempiterne vite participem facere dignetur Amen Amen