Charter Document - 02184036

Innocentius episcopus servus servorum Dei dilectis filiis monachis Sancti Bertini salutem et apostolicam benedictionem Magna nuper instantia in presentia fratrum nostrorum archiepiscoporum episcoporum et aliorum religiosorum virorum qui Remis convenerant dilectus filius noster P[etrus] abbas et fratres Cluniacenses ut abbatiam Sancti Bertini eis a predecessoribus nostris pontificibus Romanis commissam et suis privilegiis roboratam Cluniacensi restitueremus monasterio postularunt Ceterum nos ne quid festinantius debito facere videremur ex deliberato eorumdem archiepiscoporum et episcoporum consilio preteritam Epyphanie sollempnitatem vobis indutias dedimus quo videlicet termino ad nostram veniretis presentiam prefato abbati et fratribus de sua querimonia respondere parati Vos vero non venistis nec direxistis responsales Sed duo monachi ex parte venerabilium fratrum nostrorum R[ainaldi] Remensis archiepiscopi et M[ilonis] Tervanensis episcopi ac dilecti filii nostri T[heoderici] Flandrensium comitis ut eis longiores daremus indutias suppliciter nos rogarunt Quorum nimirum desideriis annuentes mediam preteritam quadragesimam vobis terminum constituimus Sed quum in vestra contumacia perdurantes obedire nostris jussionibus contempsistis nos qui licet indigni loco beati Petri apostoli residemus et suam cuique debemus justiciam conservare Cluniacense monasterium de abbatia Sancti Bertini predecessorum nostrorum inherentes vestigiis investivimus Per apostolica igitur scripta universitati vestre mandando precipimus quatinus prefato filio nostro P abbati humiliter pareatis et juxta ejus dispositionem atque consilium gravem et idoneam personam vobis in abbatem invocata Spiritus Sancti gratia eligere maturetis Datum apud Vapingum III kalendas aprilis