Charter Document - 02184035

Innocentius Episcopus servus servorum Dei dilecto filio Petro Cluniacensi Abbati salutem et Apostolicam benedictionem Canonum precepta nos instruunt ut in exequendis negotiis nihil prepropere nihil extraordinarie committamus Tua siquidem dilectio nuper Remis in presentia fratrum nostrorum Archiepiscoporum Episcoporum et aliorum Religiosorum virorum qui nobiscum eo convenerant ut Abbatiam sancti Bertini a predecessoribus nostris Romanis Pontificibus Monasterio Cluniacensi commissam et eorum privilegiis roboratam tibi restitueremus instantius postulavit Ceterum nos ex deliberato eorundem fratrum nostrorum consilio ipsius loci Monachis preteritam Epiphanie solemnitatem inducias concessimus ut videlicet tunc ad nostram venirent presentiam tibi de tuis querimoniis respondere parati Ipsi vero elapso eo termino nec venerunt nec miserunt responsales sed duos Monachos ex parte fratrum nostrorum R Archiepiscopi et N Morinensis Episcopi ac dilecti filii nostri T illustris Flandrensium Comitis longiores pacis postulantes inducias direxerunt Nos autem omnem eis occasionem auferre volentes ipsos usque ad preteritam mediam quadragesimam sustinuimus qui nimirum nec etiam tunc venerunt nec aliquos qui causam suam agerent destinarunt Quia igitur neque nos jus strictum urget neque postulat equitas ut eis in sua contumacia perdurantibus prolixiorem terminum concedamus te de prefata beati Bertini Abbatia ad reformationem Religionis predecessorum nostrorum inherentes vestigiis investimus Monachisque ejusdem Cenobii ut tibi dilecte in Domino fili Petre Abbas humiliter pareant et ut Abbatem juxta dispositionem tuam et consilium eligant per Apostolica scripta mandamus Datum apud Vapingum III Kalend Aprilis