Charter Document - 02184006
| Charter Number: | 02184006 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Mandate |
| Date: | 1130 |
| Date type: | Internal, A.D. |
| Resource Link(s): |
CCE: cartae cluniacenses electronicae |
Charter:
Ego Hu[go] sancte Romane ecclesie presbiter cardinalis apostolice sedis legatus residentibus nobiscum in concilio apud Carrionem celebrato Aldigerio Tarraconensi R[aimundo] Toletano Didago Compostellano archiepiscopis Semenone Burgensi Petro Palentino Didago Legionensi Aloni Asturicensi Petro Lucensi Munioni Migduniensi Alfonso Tudensi Hugoni Portugalensi Bernardo Conimbriensi B[ernardo] Tamorensi Sancio Avilensi Petro Secoviensi Bertranno Oxomensi Bernardo Seguntino episcopis controversiam super Villa Viridi inter Cluniacenses et monachos Sancti Facundi jam diu agitatam monachis prefati Sancti Facundi conquerentibus cognovimus Susceptis vero utriusque partis instrumentis et diligenter perfectis in carta Sancti Facundi regem A[lfonsum] quendam nobilem militem Munionem Ferrandiz nomine sine judicio suis rebus expoliasse inter que ipsa Villa Viridis continebatur et eandem villam pro anima uxoris sue Berte monasterio Sancti Facundi contulisse repperimus In scriptura vero Cluniacensium declarabatur quod Urraca regina prefati regis A[lphonsi] filia post mortem patris sui de anima illius sollicita diligenter inquireret quomodo patri suo posset subvenire et religiosorum accepto consilio ut ea que pater suus injuste abstulerat restituere satageret cuidam nobili femine nomine Gelvire filie predicti Munionis Ferrandiz conquerenti super hereditate patris sui reddidit et restituit omnem hereditatem paternam et nominatim ipsam Villam Viridem quam mater sua Isloncia dono arrarum a viro suo pretaxato Munione Ferrandiz acceperat in presentia bone memorie Bernardi Toletani archiepiscopi et P[etri] Legionensis episcopi et baronum terre quorum hec consilio acta sunt In alia vero scriptura Cluniacensium continebatur quod prefata Isloncia cum filia Gelvira prefatam Villam Viridem que ipsi Isloncie arrarum dono juste contingebat pro anima viri sui predicti Munionis Ferrandiz et suarum animarum remedio dederunt Deo et Cluniacensi sanctorum Petri et Pauli monasterio et tradiderunt in potestate[m] et jus fratrum et monachorum ipsius cenobii assensu Urrace regine et filii sui illustris A[lfonsi] confirmatione P[elagii] Asturicensis episcopi in cujus diocesi sita erat et M[auritii] ejusdem provincie Bracharensis archiepiscopi Tercio quoque loco Cluniacenses Pascalis pape privilegium ostenderunt in quo Villam Viridem et omnia que a pontificibus data vel per pontifices confirmata eidem Cluniacensi monasterio fuerant apostolica auctoritate inviolabiliter observanda sub anathematis interminatione censebantur Ea propter communicato totius concilii consilio et assensu nos sancte videlicet sedis apostolice Hu[go] legatus et Al[digerius] Tarraconensis et R[aimundus] Toletanus et D[idagus] Compostellanus archiepiscopi adjudicamus predicto monasterio Cluniacensi ipsius Ville Viridis possessionem in qua jamdiu permanserunt et ipsius Ville Viridis possidende jus omni de cetero querimonia sopita confirmamus Astante vero egregio Hispaniarum A[lfonso] rege cum consulibus et principibus terre sue Roderico Gallecie comite iterum Roderico Veliz comite iterum Roderico Martiniz comite Munione comite Petro Lupithi Roderico Gomiz et aliis quam pluribus Anno dominice incarnationis MCXXX indictione VIII