Charter Document - 02183994

Honorius Episcopus servus servorum Dei dilecto in Christo filio Petro Cluniacensi Abbati salutem et Apostolicam benedictionem Universalis Ecclesie sollicitudo nobis a Dispensatore omnium bonorum Deo commissa mentis intentionem incessanter urgere non desinit religionis statum inconvulsum servare et religiosis locis libertatem debitam custodire Sancta tamen mater Ecclesia que ad tempus ex parte peregrinatur in terris multarum oppressionum purgatur turbine et valide persecutionis examinatur fornace celumque inspiciens gemebunda suspirat donec illi celesti presentialiter uniatur que de immarcessibilis corone remunerata premio sui Creatoris contemplatione letatur Ceterum navis beati Petri celorum clavigeri cui Christus presidet Gubernator quamvis multis collidatur procellis et horrendis ventorum flatibus agitetur numquam tamen naufragii damnum incurret sed ad portum tranquillitatis cum eis qui ei adherent secura perveniet Pontius siquidem beati Benedicti inimicus preceptionibus et Monastici ordinis malleus qui Cluniacensem Abbatiam in manu predecessoris nostri felicis memorie Pape Calixti sine spe recuperationis refutaverat et se perpetuo Jerosolymis victurum voto astrinxerat contra voluntatem Dei et nostram Cluniacense Monasterium superba obstinatione et presumptione sacrilega occupavit nitorem vero religionis Cluniacensium fratrum que per totam Galliam claruerat perturbans corda simplicium veneno sue pravitatis infecit Preterea sacrilegium et rapacitatis flagitium preteritis superaddens peccatis vasa sacra et thesaurum Monasterii qui ex voto fidelium ad pauperum usus cum foret opportunum fuerat destinatus diripuit et ejus maximam portionem pro retinendis militibus sagittariis et balistariis dissipavit Quia igitur in tanta pertinacia induratus nequaquam resipiscere voluit venerabilis frater noster Humbaldus Lugdunensis Archiepiscopus Apostolice Sedis Legatus in eum excommunicationis sententiam promulgavit Ceterum postquam tantum periculum tantamque religionis stragem Cluniacensi Monasterio imminere veridica relatione cognovimus dilectum filium nostrum Petrum Diaconum Cardinalem de gremio sancte Romane Ecclesie ad partes illas mittendum duximus qui precepto et auctoritate nostra Pontium invasorem et fautores ejus vinculo anathematis innodavit Post hec autem tu dilecte fili Petre Clun Abbas et idem Pontius proximis beati Michaelis octavis ad nostram venire presentiam et de predicta controversia et excessu nostro et Romane Ecclesie obedire judicio statuistis et ne super hoc vestrum aliquis falleretur utrimque obsides in presentia prenominati dilecti filii Petri Cardinalis Diaconi prebuistis Statuto itaque termino nostro te conspectui presentasti Pontius vero cum Monachis et Burgensibus nondum tamen cum suis ab excommunicationis vinculo absolutus ad urbem venit Ut autem secundum usum Ecclesiasticum de excessu pro quo excommunicatus fuerat satisfaceret et postmodum juxta rationis ordinem ad causam suam permitteretur agendam a nostris fratribus est sepenumero requisitus ipse vero spiritu elationis tumidus in inficiationes et verborum involucra assueto more linguam extendens satisfacere nobis et Ecclesie Romane contempsit nos siquidem quosdam Monachos qui cum eo venerant post acceptam satisfactionem recepimus et ad causam suam agendam admisimus Tunc ergo te in Cluniacensem Abbatem canonice et secundum beati Benedicti regulam electum ac per predecessorem nostrum felicis memorie Papam Calixtum et per nos ipsos confirmatum modo vero per Pontium invasorem et complices suos infideles Burgenses fuisse expulsum bona etiam Monasterii et thesaurum fuisse distractum per carissimum filium nostrum Mattheum Priorem sancti Martini de Campis quem advocatum et cause tue Patronum statueras supplicem allegasti et ut tibi de ablatis restitutio et de irrogata injuria justitia fieret postulasti Ceterum Monachi qui cum Pontio venerant ex adverso Pastorem suum Pontium sibi fraudulenter ablatum nec umquam eum Cluniacensis Monasterii regimen dimisisse acclamabant Qui statim productis Apostolici viri regestorum Pape Calixti voluminibus et assertione testium qui tunc presentes fuerunt convicti sunt Ut igitur verba ipsius ad Pontium directa ponamus hec sunt Tibi precipimus ut ab hujusmodi levitate desistas et quam in manu nostra sine recuperationis spe refutasti Cluniacensem Abbatiam nullatenus molestare presumas Si vero nostri precepti transgressor extiteris gratiam beati Petri et nostram amittes etsi quando ad nos clamaveris non exaudieris Idem ad Conventum Cluniacensem inter cetera Zelum inter vos et contentiones agitari multorum relatione comperimus et vehementius aggravamur Pontius enim qui olim vestro Monasterio prefuit concordem unitatem vestram dividere et simplicitatem mentium vestrarum sollicitare non desinit unde universitati vestre precipimus ut sicut per obedientiam beati Petri salvare animas vestras cupitis protinus abjectis omnino schismatibus carissimo filio nostro Petro Cluniacensi Abbati unanimiter et devote humilitatis subjectionem et obedientiam deferatis et in Pontio illo qui in nostris manibus sine spe recuperationis Abbatiam Cluniacensem penitus refutavit nullam de cetero spem habeatis cum quod de eo in causa hac constituimus nulla prorsus ratione mutabimus Si quis autem vestrum hujus precepti nostri temerator extiterit si Abbatie vel alicujus Prelationis nomine insignitus fuerit vel ordinis promotionem habuerit dignitatis et ordinis sui detrimentum sustinebit et anathematis sententie subjacebit Idem de eodem ad te Petre fili carissime Quod autem de Pontio illo qui olim Abbatie Cluniacensi prefuit quam omnino sine recuperationis spe in manibus nostris refutavit constituimus nulla volumus ratione mutare Quocirca quemadmodum Judicis postulabat officium diligentius indagato negotio habito consilio et communi assensu fratrum nostrorum Episcoporum et Cardinalium Petro Prefecto urbis et aliis nobilibus Romanis et Legis peritis collaudantibus ex sententia de Cluniacensi Abbatia de Monachorum obedientia de omnibus tam exterius quam interius ad eamdem Abbatiam pertinentibus plenarie te per abundantem justitiam investivimus obsides vero quos pro executione justitie dederas absolventes illos quos Pontius et Burgenses pro parte sua obligaverant alligavimus Burgenses etiam de thesauro Cluniacensi Monasterio restituendo et alio damno restaurando in manu tua ad quem cura spectare cognoscitur damnavimus pena legali adhibita verum ipsius pene relaxatio est tue discretioni commissa Preterea Pontium excommunicatum invasorem depredatorem sacrilegum et schismaticum condemnantes sententiam beate recordationis predecessoris nostri Domni Pape Calixti in ipsum Pontium datam ut videlicet nullo tempore Cluniacensem Abbatiam recuperet Apostolica auctoritate firmavimus Si quis autem imposterum hanc nostre diffinitionis sententiam violare tentaverit laicus anathematis gladio feriatur clericus honoris et officii privatione mulctetur Ego Honorius Catholice Ecclesie Episcopus Ego Petrus Portuensis interfui Datum Laterani per manum Aymerici sancte Romane Ecclesie Diaconi Cardinalis Cancellarii XIII Kal Novembris indictione III anno Dominice Incarnationis MCXXVI Pontificatus autem Domni Honorii secundi Pape secundi