Charter Document - 02183991

Honorius episcopus servus servorum Dei venerabili Hu[] Lugdunensi archiepiscopo apostolice sedis legato salutem et apostolicam benedictionem Dolemus quoniam sicut accepimus religionem Cluniacensem Pontius temere perturbavit Gratias ergo tue referimus fraternitati quod tanquam religionis amator ei viriliter restitisti Instanti igitur vigilantia tam per Ecclesie ministros quam per exteras potestates illum de monasterio trahere et in carcerem ponere omnibus modis elabores Nos autem de latere nostro legatum e vestigio transmittimus qui tibi ad hoc explendum consilium et auxilium prebeat Data Lateranis VIII Kal Maii Formula excommunicationis in Pontium et Portianos Hec est excommunicatio quam fecit Petrus cardinalis sancte Romane Ecclesie legatus in virtute Spiritus sancti et auctoritate domni pape Honorii cujus vice fungitur in Pontium invasorem et schismaticum et in burgenses Cluniacenses et in omnes eorum fautores in Lugdunensi synodo VII Kal Junii in presentia episcoporum consentientium et abbatum et presbyterorum multorum et clericorum Quoniam contra voluntatem Dei et domni pape Honorii totiusque Romane Ecclesie Pontius Cluniacense monasterium irrationabilis laicorum violentia invasit Romane Ecclesie misericordiam magis quam justitie severitatem sequentes tertio tam litteris quam nuntiis eum ad nos vocavimus ut voluntatem domni pape Honorii ex ore nostro super hoc audiret eique veluti totius orbis universali Patri in omnibus obediret verum quia domno pape Honorio cujus vice fungimur obedire et de perpetrato invasionis Ecclesie scelere noluit penitere hanc injuriam Deo et apostolice sedi illatam ulterius inultam non ferentes auctoritate apostolorum Petri et Pauli et domni pape Honorii qui nobis plenam et in hoc negotio sua vice tradidit potestatem excommunicationis sententiam domni Humberti archiepiscopi Lugdunensis S R E et domni pape Honorii legati et ejus suffraganeorum in eumdem Pontium et in omnes fautores ejus juste iterum prolatam in presenti confirmamus synodo quam iterum renovantes predictum Pontium ac monachos ei coherentes nec non et burgenses Cluniacenses anathematis vinculo innodamus quousque resipiscant et ad condignam redeant satisfactionem Precipimus etiam sub anathemate ut nullus in ecclesiis vel in officinis infra ambitum muri Cluniaci aut deforis infra claustra vel pertinentiam totius burgi constitutis campanas pulsare vel officia celebrare divina vel capitulum facere presumat quousque Pontius inde exeat et ab hac infestatione quiescat Ejusdem anathematis vinculo insuper eos innectimus qui de thesauro ecclesie Cluniacensis quidquid causa donationis vel venditionis seu pignorationes acceperunt ac deinceps acceperint vel dederint Preterea obedientias in quibus Pontius suos priores intrusit scilicet Silviniacum cum Eustorgio priore et suis fautoribus Massiliam cum priore Laziacum et ejus priorem Parrona cum priore ne divina officia ibi celebrentur interdicimus Denique omne christianitatis officium supradictis locis interdicimus excepto baptismate puerorum et penitentia morientium volentium ab hac nequitia converti data securitate in manibus Lefaldi Vincentii et aliorum qui obedientiam Romane Ecclesie et Petri abbatis fidelitatem servant Eodem vinculo ligamus eos qui victualia vel arma burgensibus Cluniaci pretio vel dono in defensione hujus sceleris portant