Charter Document - 02183985
| Charter Number: | 02183985 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Quittance |
| Date: | 1125 |
| Date type: | Internal, A.D., Episcopal, Regnal |
| Resource Link(s): |
CCE: cartae cluniacenses electronicae |
Charter:
In nomine sancte et indiuidue Trinitatis Nouerit presentium posterorumque solertia quod ego Rainaldus Dei gratia humilis et indignus Remorum Archiepiscopus diu multumque laboris qualiter Altare de Turre super Materna quod manu laicali indebita usurpatione diu fuerat occupatum adeo ut quidam potentes de Plagajotri partes oblationum decime redituumque ad idem Altare provenientia municipibus suis manciparent illique quod dedecorosius est uxoribus suis et filiabus in matrimonium contraderent tandem auxiliante Spiritu sancto qui spirat ubi vult me tali conditione ab eisdem inuasoribus retraxisse Cum enim sepissime iam dictos Dominos de Plagajotri admonerem et modis omnibus illis persuaderem quod a possessione Sanctuarij Dei quod diu iniuste possidebant secederent ne Crucifixi patrimonium iniuste et violenter usurpando externam incurreret damnationem demum nostra crebra admonitione et persuasione permoti nostroque adquiescentes consilio supradictum Altare eo tenore resignaverunt videlicet ut illud sancte Cluniacensi Ecclesie que est quasi quoddam magnum totius orbis luminare liberaliter impertirem cum oblationibus et decimis exterisque ad se pertinentibus atque iam dicti Cenobij venerabilibus fratribus personaliter tenendum concederem Quorum iuste et religiose petitioni prompto et devoto annuens animo ut omnium bonorum que in tanta fuerint Congregatione particeps esse mererer memoratum Altare ipsis iure perpetuo personaliter possidendum contradidi cum omnibus ad ipsum pertinentibus hac solum interposita pactione iam dictis Dominis de Plagajotri id humiliter postulantibus quatinus Presibyter loci illius qui per eos tunc personatum parochiamque tenebat quoad vivet nisi forte propriis exigentibus culpis ea amittere contingeret libere et quiete possideat Eo autem viam uniuerse carnis ingresso sive pro qualibet rationabili causa a supradictis remoto Ecclesia Cluniacensis quod suum est videlicet Altare et personatum cum suis pertinentiis iure perpetuo possidendum reciperet liberam deinceps habens facultatem substituendi in eadem Ecclesia dum tamen idoneus sit quem voluerit Sacerdotem Qui nobis vel successoribus nostris per successionem temporis ut moris est presentatus postquam animarum curam susceperit fidelitatem eis faciet et debitam reuerentiam exhibebit saluo iure suo in iis que ad feudum Presbyterij pertinere noscuntur Et ut hec rata et inconvulsa permaneant sigilli nostri auctoritate corroborare curauimus Signum venerabilis Archiepiscopi Rainaldi S Ioyranni Abbatis sancti Nicolai S Vrfi Abbatis sancti Dionysij S Hugonis Archidiaconi S Leonis Cantoris S Albrici Magisti S Ioannis de Pi S Ioannis de Germania S Liberti Decani S Odonis Decani ciuitatis Actum Remis anno Incarnati Verbi MCXXV Indictum iii regnante Ludouico Rege Francorum anno xviii Archiepiscopatus autem domni Rainaldi anno i Fulcradus Cancellarius scripsit et subscripsit