Charter Document - 02183980
| Charter Number: | 02183980 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1125 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Honorius Episcopus servus servorum Dei dilecto filio Petro Abbati sancti Egidii et Monachis salutem et Apostolicam benedictionem Ad hoc universalis Ecclesie cura nobis a provisore omnium bonorum Deo commissa est ut Religiosas diligamus personas et beneplacentem Deo Religionem studeamus modis omnibus conservare nec enim Deo gratus aliquando famulatus impenditur nisi ex caritatis radice procedens a puritate Religionis fuerit conservatus Hoc nimirum caritatis intuitu olim predecessores nostri Apostolice memorie Romani Pontifices sancti Egidii Monasterium ad instituendum sive conservandum Religionis nitorem Cluniacensi Cenobio commiserunt Ceterum moderno tempore defuncto Hugone Abbate vestro dum locus vester Guerrarum incursu oppressus et multis persecutionibus agitatus sine Pastoris solatio stare non posset predecessor noster felicis memorie Papa Calixtus te dilecte fili Petre Abbatem constituit quod profecto sicut ex ejus voluntatis arbitrio et litteris ipsius Cluniacensi Abbati missis percipimus salvo Cluniacensis Monasterii jure atque Reverentia fecisse cognoscitur Unde universitati vestre mandamus atque precipimus ut sine contradictione ad carissimi filii nostri Petri Clun Abbatis subjectionem et obedientiam redeatis Tu vero Petre Abba infra quadraginta dies post harum acceptionem litterarum supplicii devotione ad Cluniacense Monasterium pergens Abbati obedientiam promittas et eidem Monasterio remota omni occasione professionem facias Salvo tamen in omnibus Rom Ecclesie jure Abbatis benedictione et sancte Sedis Apostolice Reverentia Quod si contemptor extiteris beati Petri et nostram indignationem incurres Datum Lateranis