Charter Document - 02183972
| Charter Number: | 02183972 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1124 |
| Date type: | Internal, A.D. |
| Resource Link(s): |
CCE: cartae cluniacenses electronicae |
Charter:
Sciant presentes et futuri quod ego Bernardus cognomento Grossus dominus castri quod dicitur Uxella poscente patruo meo Bernardo priore Cluniacensi concedo Domino Deo et sanctis apostolis Petro et Paulo monachisque Cluniacensibus perpetuo futuris quicquid juste hactenus habui vel alii per me circa clausum de Montibus videlicet intra vias que ipsum clausum ambiunt ut habeant ipsi monachi totam illam terram ex integro que est inter duas vias In qua terra si mei homines aliquam injusticiam fecerint justitiam faciam predictis monachis de ipsis hominibus Et si quid in ipsa terra intra duas vias occupaverunt quicquid illud est predictis monachis concedo Hoc donum facio ego Bernardus pro anima mea et patris mei aliorumque meorum decessorum in manu predicti domni Bernardi prioris fideliter et absque ullo retinaculo Et ut firmum sit et stabile atque remotum ab omni calumpnia cartulam fieri mando facta[m]que confirmo anno Dominice incarnationis MCXXIIII Testes hujus rei sunt qui subnotati sunt S Bernardi prioris S Bernardi de Melei S Leotardi decani de Sancto Ypolito S Stephani presbiteri de Cluniaco S Widonis de Cutiaco S Guntelmi de Sancto Ypolito S Bernardi militis qui hoc fecit S Petri monachi qui hanc cartulam scripsit