Charter Document - 02183965
| Charter Number: | 02183965 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Approval |
| Date: | 1123 |
| Date type: | Internal, A.D., Episcopal, Regnal |
| Resource Link(s): |
CCE: cartae cluniacenses electronicae |
Charter:
In nomine sancte et individue Trinitatis Patris et Filii et Spiritus Sancti Ego Rodulfus propicia divinitate Remorum licet indignus archiepiscopus controversiam inter monachos Sancti Prejecti et Cluniacenses monachos diu ventilatam tandem examinis nostri moderamine terminatam stilo mandare dignum disposui et ad noticiam omnium presenti pagina pertrahendam curavi Ingruentibus aliquando quibusdam oportunitatibus contigit a monachis Sancti Prejecti corpus ejusdem martyris in episcopatum Atrabatensem ad castellum deferri quod Betunia dicitur et per ejus merita multa signa et miracula Dominum ibidem operari Hec videntes terre illius incole simul et divine pietati congratulantes nec Sancti Prejecti beneficiis ingrati inibi in honore illius ecclesiam construxerunt et predia et possessiones multas ad eandem contulerunt Monachi vero argenteis calicibus crucibus textibus vasis palliis planetis aliis vestibus cortinis libris aliis etiam ornamentis que de monasterio suo convexerant predictam ecclesiam decoraverunt Domnus Lambertus bone memorie Atrabatensis episcopus audiens in parrechia sua absque scitu suo et archidiaconi sui ecclesiam constructam eam sibi ut propriam vendicavit et ecclesie Cluniacensi ad usus monachorum Abbatisville contradidit Hinc irarum et discordie fomes pullulavit inde scandalum inter Sancti Prejecti monachos exortum et Cluniacenses invaluit Monachi Sancti Prejecti quia gratia divina opitulante per meritum prefati martyris et quod sumptu et labore suo jam dicta ecclesia fundata fuerat suam et sui juris esse dicebant Cluniacenses quia episcopus Atrabatensis ob hoc videlicet quod eam in episcopatu suo eo inconsulto et archidiacono suo constructam invenerat illam eis largitus fuerat hanc jure sibi defensare volebant Hanc litem dirimere volentes hoc fine terminavimus quod Cluniacenses monasterio Sancti Prejecti pro ornamentis in ecclesia illa consumptis duodecim marcas argenti ad presens recompensaverunt pro censu vero dimidiam in festivitate ejusdem sancti quotannis eidem resignabunt Si vero accidente casu legatus qui eam detulerit morte vel aliquo impedimento preventus fuerit monachi Sancti Prejecti haud minus omni occasione sopita a Cluniacensibus prefixam pactionem dimidiam videlicet marcam recipient et sic Cluniacenses sepefatam ecclesiam quietam et inconcussam deinceps retinebunt Hanc autem testamentalem scedulam ut omnis inter eos in eternum querela exterminetur signis et probabilibus personis cum nostre imaginis additamento approbatam esse statuimus Signum Lisiardi Suessionensis episcopi + Signum Ebali Catalaunensis episcopi + Signum Engelranni Ambianensis episcopi + Signum Symonis Noviomensis episcopi + Signum Johannis Morinensis episcopi + Signum Clarembaldi Silvanectensis episcopi + Signum Odonis abbatis Sancti Remigii + Signum Nicholai Remensis archidiaconi + Signum Hugonis Remensis archidiaconi + Signum Joffridi decani + Signum Frederici prepositi + Signum Leonis cantoris Actum Remis anno incarnati Verbi millesimo centesimo XXIII indictione I regnante Ludovico venerabili rege Francorum anno XV archiepiscopatus autem domni Rodulfi archiepiscopi anno XVI Fulcradus cancellarius scripsit et subscripsit