Charter Document - 02183962

Calixtus episcopus servus servorum Dei dilectis in Christo filiis Cluniacensis monasterii monachis salutem et apostolicam benedictionem Quia nos in pastorum nostrorum defectione omnipotens Dominus hoc tempore visitavit monasterium vestrum in multis magnum incurrisse incommodum et fraternitatem vestram detrimenta nonnulla perpeti audivimus et labores Unde tanto nos contristari et dolere gravius cognoscatis quanto amplius locus idem ad Romanam videtur Ecclesiam pertinere Verumtamen vos filii in Domino dilectissimi super hujusmodi perturbationibus non miremini scientes quia omnes qui pie volunt vivere in Christo persecutionem patientur Ad coronam quippe nisi per tribulationes et certamina non pervenitur dicente Apostolo ac testante Nemo coronabitur nisi qui legitime certaverit In his itaque certaminibus non formidetis neque terreamini quia confortator et auxiliator vobis Dominus aderit qui sperantes in se minime derelinquit sed de celo victoriam tribuit ei coronam immarcescibilem glorie suis fidelibus usque in finem viriliter persistentibus administrat Nos quoque vos tanquam filios nostros charissimos semper diligere semper in quantum poterimus adjuvare ac semper Domino auxiliante protegere procurabimus Abbatem sane vestrum Petrum quem nuper ad honorem Dei et beati Petri nec non et vestri utilitatem monasterii communi voto et conniventia elegistis nos in ejusdem administratione regiminis sancto cooperante Spiritu stabilimus quem sic specialem beati Petri filium specialiter diligere volumus atque ipsi et per eum vestro monasterio possessiones bona omnia et dignitates quas nostri vobis confirmavere predecessores et quas hactenus locus vester quiete habuisse dignoscitur confirmamus Precipimus etiam et statuentes penitus interdicimus ne quis fratrum vestrorum aut ulla omnino persona occasione Pontii olim abbatis in vestra audeat congregatione scandalum suscitare Nam sicut ei nos monasterium ipsum ex parte Beati Petri et Romane commiseramus Ecclesie ita ipse illud in manu nostra per quamdam virgam beato Petro et Romane Ecclesie absque ulla recuperationis spe in perpetuum refutavit Si quis ergo contra nostrum interdictum hoc in vestra quod absit congregatione scandalum commovere presumpserit Dei et beati Petri atque apostolice sedis indignationem incurret qui autem conservator exstiterit et predicto abbati Petro reverentiam debitam et obedientiam exhibuerit omnipotentis Dei et apostolorum Petri et Pauli et nostram gratiam nec non et peccatorum suorum largiente Domino indulgentiam obtinebit Datum Laterani xi Kal Novembris indictione prima