Charter Document - 02183957
| Charter Number: | 02183957 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1122 |
| Date type: | Internal, A.D., Papal |
| Resource Link(s): |
CCE: cartae cluniacenses electronicae |
Charter:
Calixtus episcopus servus servorum Dei karissimo in Christo filio Pontio Cluniacensi abbati ejusque successoribus regulariter substituendis in perpetuum Religionis monastice modernis temporibus speculum et in Galliarum partibus documentum Beati Petri Cluniacense monasterium ab ipso sue fundationis exordio sedi apostolice in jus proprium est oblatum Proinde patres nostri sancte recordationis Johannes undecimus et alii ad nostra tempora pontifices ecclesie Romane locum ipsum singularis dilectionis ac libertatis prerogativa donarunt et universa ei pertinentia privilegiorum suorum sanctionibus munierunt Propterea fili in Christo karissime Ponti quem nos in Viennensis ecclesie regimine positi nostris per Dei gratiam manibus in abbatem consecravimus et personam tuam et locum cui Domino auctore presides totis dilectionis visceribus amplectentes et quieti vestre et ecclesiarum vestrarum attentius providentes ecclesiam Sancti Theodori de Rochabovecourt cum omnibus pertinentiis suis laudantibus ipsius ecclesie clericis a venerabili fratre nostro Willelmo Petragoricensi episcopo tibi et ecclesie Cluniacensi humiliter et devote donatam auctoritate apostolica tam tibi quam successoribus tuis perpetuis temporibus confirmamus et presentis privilegii pagina committimus Si quis igitur ausu temerario impiaque presumptione contra Deum et sanctos ejus apostolos contra animam suam hoc nostre apostolice auctoritatis privilegium in aliquo infringere temptaverit incunctanter se noverit nostre apostolice maledictionis aculeo transpunctum nostre apostolice excommunicationis telo perfossum nostri etiam apostolici anathematis gladio transverberatum nec nisi per dignam satisfactionem saluti pristine reparandum Ei vero qui conservator extiterit sit pax Domini nostri Jesu Christi quatinus et hic fructum bone actionis percipiat et apud districtum judicem premium eterne pacis inveniat Amen Amen Amen Ego Calixtus catholice ecclesie episcopus subscripsi Datum Laterani per manum Grisogoni sancte Romane ecclesie diaconi cardinalis [ac] bibliothecarii V idus januarii indictione XV incarnationis Dominice anno MCXXII pontificatus autem domni Calixti secundi pape anno vero IIII