Charter Document - 02183909
Charter Number: | 02183909 |
---|---|
Cartulary Title: | Recueil des Chartes de l'Abbaye de Cluny |
Charter Language: | Latin |
Charter Origin: | Religious |
Charter Type(s): | Mortgage |
Date: | 1114 |
Date type: | Internal, A.D., Calendar |
Resource Link(s): |
CCE: cartae cluniacenses electronicae |
Charter:
Notum sit omnibus Christi fidelibus tam presentibus quam futuris quia dum bone memorie domnus Ademarus abbas Lemovicensis obisset orta est dissensio de electione abbatis sed veniens domnus ac venerabilis Pontius Cluniacensis abbas sedato tumultu monachorum ac burgensium qui auctoritate Ademari nobilissimi vicecomitis maxime fuerat exortus predictum vicecomitem ex hoc convenit Qui ejus redargutionem ut erat vir sapiens benigne suscipiens in capitulo coram omnibus ipsam electionem omnino guerpivit vel dimisit una cum filio suo Guidone Quod et abbates qui presentes aderant et ejusdem cenobii fratres fecerunt et se in voluntate et dispositione domni Pontii abbatis ex toto commiserunt Supradictus etiam vicecomes Ademarus confirmavit in manu domni Pontii abbatis donum quod pater ejus Ademarus de monasterio fecerat ut neque ipse neque filii ejus neque aliquis ex propinquis vel successoribus ipsius futuris temporibus ullo modo ipsam electionem requirerent vel inde se intromitterent sed sicut auctoritate apostolica decretum est et maxime Urbani pape in potestate et arbitrio atque ordinatione abbatum Cluniacensium tam electio abbatis quam dispositio ejusdem cenobii Sancti Marcialis per cuncta sibi succedentia tempora permanerent Quo facto abbatem eis prudentissimum virum domnum Bernardum olim camerarium tunc autem Cluniacensem priorem constituit In cujus electione et ordinatione omnes pariter una voce acclamaverunt Acta sunt hec apud Lemovicas publice anno ab incarnatione Domini nostri Jesu Christi millesimo CXIIII indictione VII epacta XII nonis octobris testes autem fuerunt hi Rainaldus abbas Vosiensis Stephanus abbas Sancti Augustini Ademarus abbas Sancti Sori Eldebertus decanus sedis Lemovicensis cum omni capitulo Laici autem fuerunt Amelius de Cambone Geraldus et Gulferius frater ejus de Turribus Bernardus de Vivinneh et Aimericus Bernardus frater ejus Theotardus vicarius regnante Ludovico rege Francorum presidente in sede Lemovicensi Eustorgio pontifice