Charter Document - 02183897

In nomine sancte et indiuidue Trinitatis Patris et Filij et Spiritus sancti Riquinis Dei gratia Prouisor Tullensium Pontio Abbati Cluniacensi eiusque successoribus regulariter promovendis in perpetuum Apostolice dignitatis sublimitas tanto propensiori studio a cunctis est fidelibus incessanter honoranda quanto constat evidentius quoniam eorum meritis et doctrina ut Sol et Luna sancta refulget Ecclesia que fundata super petra heretice pravitatis irritamenta respuit nec recipit blandimenta Cum igitur omnibus quos Rex celestis regni et glorie sue confortes instituit pie devotionis sit adhibendum studium instantius tamen ei precordialis desiderij licet vigilanter impendere famulatum cui Deus Ecclesie sanguine suo redempte specialiter constituit principatum qui post Deum custos gregis et pastor extat ovium ianitor celi et Princeps Apostolorum Denique beati Petri nomine et titulo triumphaliter insignita sub prerogativa religionis fulget incomparabiliter fanda Cluniacensis Ecclesia que clausis et depressis oculis carnalibus fervore spirituali docet inhianter contemplari celestia qua summi Patrisfamilias ut vere dicta uniuersalis Domus est et Curia in qua Deo sacra laudum resultant preconia Ab hac siquidem felici turma et inexpugnabili exercitu Ierusalem superna agmina sibi assumit purpurea que super thronos iudicantium ordinum residendo gestant florentia ferta Felix fatis et beata deuotio tam celeberrime congregationis et Ecclesie obsequiis et cultui fideliter inservire Cuius ego licet indignus beneficij et orationum executor et particeps cupiens existere hanc pro modulo meo necessariis ampliare sumptibus et qua in nostra Dioecesi possidebant tenore Canonico proposui stabilire Ad perpetuam itaque Monasterij tui pacem Ponti in Christo dilectissime fili manifestamus posterorum notitie determinationem cause Frodoni Celle nostris temporibus definite Abbas denique Mediani Monasterij Bertricus nomine in generali Synodo nostram censuram adiens querimoniam movit super Wicardo Priore Frondonensis Celle afferens quoniam Odoinus vir illustris fancto Petro Mediani Monasterij coram liberis testibus de Cella illa donum et inuestituram fecisset sed facta postmodum retractatione Cluniacensis Ecclesia eam inrationabiliter etiam presumptuose invasisset Prefatus siquidem Odoinus ibidem tunc presens hoc omnimodis denegavit etiam se numquam Ecclesie Mediani Monasterij inde donationem fecisse productis liberalibus testibus iurare proposuit Prior autem usus prudentiori consilio Abbatem suum ut res exigebat super hoc consulturus usque ad proximam Synodum induciis petiit quas cum prolixitate itineris tum remotione Abbatis usque ad tertiam synodum ingruente rei difficultate protraxit Tandem igitur in medio totius synodalis Conuentus protulit chartam felicis predecessoris nostri pie memorie Pibonis sigillo insignitam in qua continebatur quod per manum predicti Pontificis domnus Odoinus de Cella Frondonensi etiam omnibus appenditiis suis sancto Petro Cluniacensi liberaliter donationem fecisset et etiam Abbas Cluniacensis iam fere per xxx annos sub sua dispositione quiete possedisset Super hoc et ipse Odoinus ultimo se constanter intulit et hec ita se habere adhibitis sex liberalibus testibus iureiurando probavit Tam evidenti ratione tam probabili discussione Abbas Mediani Monasteri vana spe frustratus recessit Prior vero Cluniacensis quod nostri erat officij super hoc fieri postulavit Banno ergo Dei et nostro auctoritate etiam Pontificali sancimus et interdicimus ne aliquis deinceps Ecclesie Cluniacensi pro Cella Frodonensi calumniam moveat alioquin maledictionem extreme districtionis in anima sua inveniat nec habeat partem in forte electorum Dei nisi digne satisfaciens resipiscat Tibi autem et omnibus tuis in suo sancto servitio concedat divina miseratio perseverantiam propositi salutaris detque Dominus faciem vestram ut adamantem et filicem ut cum magna libertate possitis obiurgare domum exasperantem Ad excludendam itaque omnem impostorum controuersiam fieri decrevimus huius descriptionis paginam quam sigillo nostro legitime confirmantes signis et testimonio nostrorum fidelium tradidimus roborandam Signum Riquini Episcopi S Theomari Abbatis S Mansueti S Vindrici Abbatis S Apri S Stephani Primicerij S Berengarij Decani S Hugonis Archid S Gotberti Archid et Cantoris S Odoini S Theoderici de S Hilario S Theoderici de Caluomonte S Equini de Barbani villa S Girardi de Blanteriis S Adelini de Girancort S Galteri de Caluomonte S Galteri et Theoderici fratris eius de Vinricort Acta sunt hec Tulli in Synodo generali in maiori Ecclesia S Protomartyris Stephani anno ab Incarnatione Domini MCXI ordinationis vero nostra iiii Indictione iv epacta ix concurrente vi imperante Henrico iv regnante Domino nostro Iesu Christo feliciter Amen