Charter Document - 02183746
| Charter Number: | 02183746 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1100 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Divine miserationis ineffabilis dulcedo filium suum pro nostra redemptione incarnandum ex servili forma in nostre mortalitatis naturam mittens ut humane dignitatis conditio nec post lapsum periret quanta dilectione circa nos specialiter habundaverit ex hoc manifeste cognoscitur quod angelice creature ruine nullatenus post culpam miseretur Quocirca quoniam ipse prior nos dilexit diligendus est et ne nos tantis beneficiis ingratos gehenne deputet formidandus si dum licet tempus acceptabile diesque salutis negligimus et animabus in perpetuum victuris medicare non satagimus Nam procul dubio constat quia post mortem corporis nullus locus venie animabus conceditur nisi illis qui in hoc seculo positi elemosinis [] misericordie operibus insudare conantur Quapropter ego Ermentrudis facinorum meorum mole perterrita sed ex misericordia illius qui mortem peccatorum non optat relevata et confortata ante mortem meam quendam mansum pro remedio anime mee et pro corporis [mei] sepultura loco Cluniacensi tradidi ita ut absque calumpnia vel inquietudine cujuslibet persone post mortem meam prefatus locus in perpetuum habeat Dedi etiam et concessi non solummodo supradictum mansum sed etiam quicquid in eadem villa cujus nomen est Lium habebam [vel habere debebam et in villa qui dicitur Nocles et in villa Caisiaco et in villa Macheriaco totum ab integro dono et laudo supradicto loco sine ullo calumpniatore] post mortem Widonis nepotis mei si ipse sine legi[ti]mo herede moreretur cui cum tali tenore concesseram eidem loco donavi Hanc tamen conventionem retinens ut idem nepos in eodem loco sepeliretur Si quis autem Sathane instinctu aut improbo ausu sepe dicto surripere loco presumpserit nisi resipuerit cum Pilato et Juda cum Anania et Saphira cum diabolo et angelis ejus utpote raptor et sacrilegus perpetuis crucietur in ignibus quoniam ea que neque nepti mee neque alicui propinquorum meorum sed Deo omnipotenti et servis suis tantummodo concessi et dedi nefas rapine et sacrilegii est vel modicum diminuere S Widonis nepotis mei S Constantii de Praildis S Johannis de Blacio S Petri Artamali S Dodonis presbiteri et Wilelmi presbiteri S Heynrici et uxoris ejus