Charter Document - 02183742

Noverint omnes fratres nostri presentes et futuri quod ego Hugo abbas diu tractantibus meque instanter deprecantibus filiis ac fratribus nostris domno videlicet Heinrico priore domno Bernardo camerario Hugone cellarario Ilio decano Artaldo decano de Lordono pluribusque aliis concedo perenniterque dono obedientiam de Igaranda cum appendiciis suis satis scilicet defraudatam et attenuatam Marciniacensi loco sororibusque nostris ibi die ac nocte servientibus Deo quarum procurationem commisimus filio nostro domno Seguino Visum est namque nobis et dicitur a multis quod postquam hec obedientia Marciniaco pertinuerit quia prope sita est frater illius loci eam studiose colendo sepius videndo plura ibidem adquirendo poterit ipsam edificare et ad utilitatem sororum illarum meliorare Pro cujus commutacione laudantibus similiter et poscentibus fratribus nostris damus quedam de his que Marciniaco appendebant camere Cluniacensi quasdam videlicet obedientias villas mansos reditus atque pecunias quorum nomina hic habentur posita Primitus vero ponitur inter cetera tota obedientia de Berziaco villa cum omnibus ibidem pertinentibus terra Faletrudis que nominatur similiter de Berziaco villa in qua jam dictus Seguinus donavit quatuor milia solidos et ducentos viginti et unum palefredum obedientia de Furchas solvens annuatim decem solidos Morlanenses in obedientia de Cavaros viginti sextarii fabarum in obedientia de Amberta viginti solidi Lugdunensis monete mansus de Monte Canino reddens septem solidos ejusdem monete vel parcerencus fiet ibidem si magis placuerit camerario mansus de la Charala de quo solvuntur quindecim solidi ejusdem monete vel parcerencus in villa de Bruales et in villa de Salas quicquid Marciniacus ibi habebat vinee scilicet et castanaria ubi octo quarrate vini recipi solent si non coquatur aut tempestetur in villa de Ronnens septem solidi ejusdem monete et quinque asinate sigili in villa de Aquispassis septem solidi ejusdem monete obedientia de Telerias reddens quindecim summatas salis debitales in villa de Salins una caldaria solvens annuatim quinquaginta solidos mansus de Rocha reddens medietatem vini unius vinee et unum prandium mansus de Vilars Manols solvens similiter medietatem vini unius vinee et unum prandium et taschiam ipsius terre et duos solidos in festivitate sancti Martini mansus de Marriaco reddens duos panes et duodecim nummos et unus campus appendens huic manso reddens taschiam terra Bosroen quam dedit Marciniaco Fulcrens pro filia sua mansus de Vallis quem dedit Hugo Ferruls obedientia de Saltu et omnia que ibi pertinent in villa de Cavaniaco unus mansus in villa de Catgiset unus clausus quem dedit Marciniaco Ada soror domni Hugonis cellararii excepto uno modio vini quem ipsa dedit monachis de Quadrella in valle de Matciaco quicquid Regina de Obled dedit Marciniaco post mortem filii sui Sub hac etiam convenientia concessit domnus abbas camerario ut per manum ipsius in predicto loco Marciniensi domina una reciperetur nichil ibi tribuens nisi quod juxta morem aliarum dominarum honeste esset induta quicquid autem ipsa dedisset sive terram sive pecuniam camerarius in proprio haberet Hoc tantum in obedientia de Berziaco retentum fuisse omnes noverint quod ex ipsa in anniversario patris nostri domni Hugonis abbatis plena refectio Cluniensi conventui in perpetuum amministrabitur et in anniversario domni Petri de Gletens tantum generalis eidem conventui de ea preparabitur In obedientia etiam de Ygaranda hoc solum retineri cunctis ignotescat quod frater ille qui Marciniaci curam gesserit ex ea in anniversario domni Dalmatii de Sinemuro patris videlicet domni Hugonis abbatis generalem tantummodo Cluniensibus fratribus perpetuo solverit Facta est hec commutatio sicut hic scripta habetur anno ab incarnatione Domini MC sedente in Romana ecclesia Pascali papa secondo que communi consilio facta et definita in Cluniensi capitulo coram me Hugone abbate coramque toto conventu recitata est firmiterque laudata Unde quia ita est et hec commutatio ad utilitatem utriusque domus Cluniensis videlicet et Marciniensis facta est volumus et ex parte Dei et beati Petri deprecamur quatinus quod fecimus fratres et successores nostri sic factum teneant nec violare presumant Si quis autem hoc institutum violaverit et ad priorem statum reducere non erubuerit videat ipse quid fecerit nos tamen non alio eum ferientes gladio totum inter Deum et ipsum ponimus unde pre omnibus Deum timeat omnibus vero ita servantibus predictumque locum ubi sorores ille pro Deo pauperes facte sunt juvantibus sit pax perennis et gaudium sine fine