Charter Document - 02183732
| Charter Number: | 02183732 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1099 |
| Date type: | Internal, A.D., Episcopal, Regnal |
| Resource Link(s): |
CCE: cartae cluniacenses electronicae |
Charter:
In nomine sancte et individue Trinitatis Patris et Filii et Spiritus Sancti Noverit presentium posterorumque solertia altare de Turri super Maternam quondam in laicorum jura cessisse adeoque eorum indebita usurpatione tenaciter occupatum ut quidam potentes de Plagaiotri partes oblationum decime redituumque ad idem altare pertinentium municipibus suis manciparent illique quod dedecorosius est uxoribus suis et filiabus in matrimonium contraderent Tandem venerabilis memorie domni Rainoldi [Remensis] archiepiscopi consilio et crebra admonitione permoti hereditate sanctuarium Dei indignum possidere judicantes et ab injusta pervasione animum revocantes eidem archiepiscopo supradictum altare eo tenore resignaverunt videlicet ut illud ecclesie Sancti Petri Cluniacensis impertiret et absque persona perpetualiter tenendum concederet Cui religioni petitioni idem vir religiosus nullatenus adversatur et altare memoratum ecclesie pretaxate hac solum pactione interposita contradidit ut presbiter loci illius qui tunc temporis personatum parochiamque tenebat quoad viveret nisi forte propriis exigentibus culpis eam amittere contingeret libere et quiete possideret eo autem viam universe carnis ingresso sive cujuslibet pro qualitate criminis a supradictis amoto ecclesia Cluniacensis quod suum erat scilicet predictum personatum perpetuo tenendum reciperet Hujus elemosine largitionem venerabilis domnus Rainoldus archiepiscopus ecclesie Cluniacensi contulit et ut inconvulsa permaneret testamentalibus eam litteris cum sigilli sui impressione roboravit Succedente autem in episcopatu eidem Rainoldo Manasse reverendo archiepiscopo prefatum presbiterum contigit graviter deliquisse et post diligentissimam criminis discussionem cum in presentia memorati pontificis justa judicii censura eidem presbytero sepe dictus personatus cum parochia abjudicatus fuisset ecclesiam Cluniacensem eundem personatum et parochiam recepisse Porro sepe replicatus presbyter dum personatum et prefatam simul parochiam solitus esset regere multa de reditibus altaris omnia sui juris esse asserens personatui suo vindicavit utpote vir qui ejusdem loci oriundus extiterat et cujus opes exiguas homines ville illius amoris et consanguinitatis causa de suo magis volebant augeri quam laicorum de rebus male possessis facultates ditari Domni igitur archiepiscopi circumspectio providens in posterum ne inter monachos et presbiterum in parochia sepe memorata substituendum de decima de oblationibus ceterisque altaris reditibus aliqua conturbationis jurgia suborirentur consilio Manasse archidiaconi Gisleberti ejusdem parochie decani Milonis subdecani ceterorumque vicinie illius clericorum litem equo discretionis moderamine terminavit ita ut presbiter parochie sepe fate deserviturus vini et annone oblationumque mediam partem reciperet cujus videlicet totum presbyter qui personatum simul et parochiam tenebat accipere solitus esset Concessa est ei etiam oblationis illius media portio que in missa parochiani defuncti et a monacho recepti ejusdem monachi manibus oblata proveniret exceptis oblationibus nubentium et mulierum celebratis nuptiis et in purificatione sua ad ecclesiam redeuntium missarum in anniversariis in tricesimo die obitus alicujus sive infra celebrandarum aliarum denique familiarium quas ad eundem presbiterum pertinere nemini constat ambiguum Postremo ut hujus pactionis assertio in futurum non cassanda permaneat testamentali eam scedula cum sigilli sui imagine personarumque probabilium signis in testimonium roboravit Signum ejusdem Manasse venerabilis archiepiscopi S Manasse archidiaconi S Radulphi prepositi S Richeri cantoris S Odalrici S Ade S Gisleberti decani S Milonis subdecani S Rainoldi S Balduini Anguille Actum Remis anno incarnati Verbi MXCVIIII indictione VI regnante Philippo Francorum rege anno XXXVI archiepiscopatus autem domni Manasse anno IIII Fulcradus cancellarius recognovit scripsit et subscripsit