Charter Document - 02183725
| Charter Number: | 02183725 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Confirmation |
| Date: | 1097 |
| Date type: | Internal, A.D., Papal |
| Resource Link(s): |
CCE: cartae cluniacenses electronicae |
Charter:
Quoniam dispositio ecclesiarum omnipotentis Dei gratia in regimine et providentia est commissa episcoporum pio studio invigilare debet circumspecta sollicitudo eorum ut ea que bene ordinata sunt confirmare confirmata ad meliora semper provehere satagant ea vero que a rectitudinis tramite deviare conspexerint ad equitatis lineam reducere studeant Quapropter ego Rannulfus Santonice sedis episcopus diu dolens cenobium Sancti Stephani de Beania per vitam secularium abbatum pariter et monachorum ante nostri pontificatus tempora pessumdatum ac religione destitutum expectabam oportunitatem nostris diebus ad ejusdem cenobii restitutionem Qua tandem morte Gislemundi abbatis inventa quamtocius convenire festinavi comitem Engolismensem Wilelmum et Fulcaldum de Archiaco in quorum consilio et tuitione quantum ad secularem providentia monasterii consistere videbatur Communicato itaque consilio cum archidiaconis et canonicis nostris pariterque principibus prenominatis aliisque idoneis personis omnes simul unanimi voluntate et tranquilla pace concordavimus ut salvo in omnibus jure episcopali et matris ecclesie Santonice sedis curam et ordinationem suprascripti cenobii in sanctam et sapientem manum domini Hugonis abbatis Cluniacensis et omnium successorum mittere deberemus Volumus igitur et concedimus et laudamus ego Rannulfus episcopus et Wilelmus comes et Fulchaldus de Archiacho ut ab hoc die in sempiternum maneat subjectum idem monasterium monasterio Cluniacensi et omnibus abbatibus Cluniacensibus sicut omnia sua monasteria sub ordinatis abbatibus Deo servientia sibi subdita cognoscuntur salvo tamen in omnibus jure pontificali et auctoritate Santonice sedis Et ut concessio vel donatio ista firma et rata maneat in perpetuum huic carte subscribere et crucis signacula propriis manibus imprimere curavimus Signum Rannulphi episcopi + S Wilelmi comitis S Fulcaldi Testes et laudatores sunt hii subnotati Amaluinus archidiaconus Petrus archidiaconus qui hanc cartam dictavit Arduinus magister ecclesie Santonensis Gaufridus cantor Factum est hoc anno ab incarnatione Verbi sempiterni millesimo XCVII epacta IIII concurrente III Urbano II Romane sedis pontificatum exornante Amato archiepiscopatum Burdegalensem administrante pariterque beati Petri legatione fungente Philippo in Francia regnante Wilelmo ducatum Aquitanie tenente