Charter Document - 02183720

Urbanus Episcopus servus servorum Dei venerabili fratri Hugoni Cluniacensi Abbati ejusque successoribus regulariter substituendis in perpetuum Cum omnium fidelium petitionibus et necessitatibus subvenire debeat Apostolice caritatis gratia multo magis his est impertienda ejus beneficii clementia quos singulariter filios se gaudet habere Romana mater Ecclesia Inter quos quoniam Cluniacensis congregatio divino charismate ceteris imbuta plenius ut alter sol enitet in terris adeo ut his nunc temporibus ipsi potius conveniat quod a Domino dictum est vos estis lux mundi Eo magis o carissime frater Hugo sublimitatis Apostolice authoritas cogitur prebere vestris petitionibus assensum cum etiam pro sanctimonia vite desideriis vestris parere novimus auctorem omnium eapropter quidquid libertatis quidquid tuitionis quidquid authoritatis predecessores nostri Ecclesie Romane Pontifices presertim Apostolice memorie Gregorius VII vestro Monasterio et locis ad id pertinentibus contulerunt Nos quoque presenti decreto auctore Deo confirmamus scilicet ut cuncta loca et Monasteria ad Cluniacense Cenobium pertinentia que ab aliquibus fidelibus Christianis Regibus Episcopis Ducibus Comitibus seu Principibus eidem loco sunt concessa et ab antecessoribus tuis acquisita et quecumque ad eumdem locum aliquo modo pertinere videntur vel in posterum dabuntur sive terre sive Ecclesie sive decime et quecumque quorumcumque beneficia fidelium absque ullius contradictione cum magna quiete et securitate tu et tui possideatis et per te universi successores tui in perpetuum Necnon sub divini judicii promulgatione et confirmatione et anathematis interdictione corroborantes decernimus ut nullus Episcopus seu quilibet Sacerdotum in eodem venerabili Cenobio neque omnino in aliquo loco huic subdito pro aliqua ordinatione seu consecratione Altaris vel Ecclesie Presbyterorum vel Diaconorum Missarumque celebratione nisi ab Abbate ejus Cenobii vel Prioribus eidem Cenobio subditis invitatus fuerit venire ad agendum presumat Sed liceat Monachis tuis ubicumque positis cujuscumque voluerint ordinationis gradum suscipere ubicumque tibi et illis vestrisque successoribus placuerit Interdicimus autem sub simili anathematis promulgatione ut neque Cluniacum neque loca ad id pertinentia ubicumque Episcopi vel Sacerdotis deprimantur interdictionis titulo seu excommunicationis vinculo vel anathematis non enim patitur sancte Sedis Apostolice authoritas ut ullius cujuscumque persone obligatione proscindatur a se cuilibet concessa libertatis potestas Non igitur fratres tui et Monachi ubicumque cujuscumque Episcopi vel maledictionis vel excommunicationis seu interdictionis vinculo teneantur astricti Quod si quis sciens hanc nostram paginam contra hanc facere presumpserit authoritate B Petri cui Conditor omnium ligandi atque solvendi potestatem commisit Ecclesia vestra et ipsi Monachi absolvantur Et is quicumque sit qui Apostolice Sedis filium ligare sive maledicere contra nostrum decretum voluerit maledictione perpetua ligetur anathematizetur condemnetur Si qua vero competens ratio adversus quicquam moverit et hoc aliter determinari vel diffiniri nequiverit judicium Apostolicum quod nulli prejudicium pretendere patitur super hoc patienter prestoletur et humiliter requiratur Liceat quoque vobis seu fratribus in Ecclesiis vestris Presbyteros eligere ita tamen ut ab Episcopis vel ab Episcoporum Vicariis animarum curam absque venalitate suscipiant quam si committere illi quod absit ex pravitate noluerint tunc Presbyteri ex Apostolice Sedis benignitate officia celebrandi licentiam assequantur Ecclesiarum vero seu Altarium consecrationes ab Episcopis in quorum Diecesibus sunt locorum vestrorum fratres accipiant Siquidem gratis ac sine pravitate voluerint exhibere alioquin a Catholico quem malueritis Episcopo consecrationum ipsarum Sacramenta suscipiant Decernimus etiam et illius cujus vice quamvis indigni fungimur authoritate sancimus ut idem locus et loca ei subdita omnibus ob salutem confugientibus sint misericordie sinus sint totius pietatis et salutis portus obtineat in eis locum justus nec repellatur penitere volens injustus prebeatur innocentibus caritas mutue fraternitatis non negetur offensis spes salutis et indulgentia pietatis Et si aliquis etiam cujuscumque obligatus anathemate eundem locum vel loca ei subdita expetierit sive pro corporis sepultura seu alterius utilitatis ac salutis gratia minime a venia et optata misericordia excludatur sed oleo medicamenti salutaris fovendus benigniter colligatur quia et justum sic est ut in domo pietatis et justo prebeatur dilectio sancte fraternitatis et ad veniam confugienti peccatori non negetur medicamentum indulgentie et salutis Sit autem et omnibus ibi advenientibus causa salutis hic et in perpetuum divine miserationis et pietatis refugium et Apostolice benedictionis et absolutionis presidium Hanc etiam vobis prerogativam concedimus ut quisquis ad vos alieni Monasterii Monachus pro vite melioratione transierit licenter recipiatur remotis Prioris loci querimoniis ut largiente Domino salutis quam querere videtur apud vos potiatur effectu Clericos quoque regulares quos Canonicos vocant qui vel in locis suis salvari non possunt vel pro necessitatibus ad loca vestra confugiunt suscipiendi et vestrum propositum admittendi licentiam impertimur Decernimus preterea et omnino constituimus ut predicti loci obeunte Abbate non ibi alicujuscumque persone violentia constituatur ordinandus sed ab ipsa congregatione loci secundum timorem Dei et institutionem Legislatoris Benedicti pater qui sibi preesse debeat eligatur atque ad cum ordinandum qualiscumque illis placuerit Episcopus advocetur Preterea constituimus ut nulli omnino hominum liceat vestrum venerabile Cenobium et loca ei subdita temere perturbare sed eorum Ecclesie decime possessiones et bona cetera que pro animarum salute jam donata sunt vel in futurum Domino miserante donari contigerit firma vobis vestrisque successoribus et illibata permaneant Si qua igitur Ecclesiastica secularisve persona hanc nostram constitutionem sciens contra eam temere venire tentaverit secundo tertiove commonita si non satisfactione congrua emendaverit potestatis honorisque sui dignitate careat reamque se divino judicio existere de perpetrata iniquitate cognoscat et a sacratissimo corpore et sanguine Dei et Domini Redemptoris Jesu Christi aliena fiat atque in extremo examine districte ultioni subjaceat cunctis autem justa eidem Cenobio suisque locis servantibus sit pax Domini nostri Jesu Christi quatinus hic fructum bone actionis percipiant et apud districtum judicem premia etern[] pacis inveniant Amen Datum Laterani V Idus Januarii Indictione V