Charter Document - 02183689

Anno Incarnationis Dominice millesimo nonagesimo quinto indictione tertia viii Kalend Novembris Domnus et venerabilis Urbanus Papa secundus sacravit altare primum et majus novi nostri Monasterii in honorem Dei in memoriam beatorum Apostolorum Petri et Pauli Sacravit etiam per se et altare secundum Misse matutina lis Lugdunensis autem Archiepiscopus Hugo Pisanus Archiepiscopus Dabertus Episcopus Signanus Bruno eodem die in ipso Monasterio jubente Papa tria in tribus primis cancellis sacrarunt altaria Tunc Papa in sacrando Missasque agendo post alia salutis hortamenta coram Episcopis et Cardinalibus multorumque personis hujuscemodi sermonem habuit ad populum Sancti Patres et majores nostri Romani Pontifices qui sancte Sedi Apostolice presederunt ex quo locus Cluniacus institutus est ab initio et Monasterium istud fundatum tam locum hunc quam Rectores vel Habitatores ejus propensius dilexerunt foverunt et curaverunt attentius et merito nam pius ille Guilielmus istius olim Monasterii Institutor nulli alii Advocato nulli Patrono nulli Regi vel Principi curam ipsius tutelamque commendavit nisi Deo et beato Petro ejusque Vicariis Romanis scilicet Pontificibus quorum numero vel ordini divina me dignatio licet indignum associavit me olim Monachum Prioremque Monasterii hujus sub Domno ac venerabili Hugone Dei misericordia adhuc superstite et benevalente Igitur sicut Pontifices summi ante me succedebant sibi in Apostolica Sede successerunt etiam ad tuendum curandumque propensius locum istum Verumtamen nullus eorum per suam corporalem presentiam locum istum hactenus visitavit Mihi vero sicut in presentiarum cernitis id divina concessit clementia Denique inter alias causas que nos ad visitandas Gallias impulerunt hec prima et precipua fuit ut locum istum et congregationem hanc speciali nobis cognatione germanam nostra presentia letificaremus nostro accessu et alloquio juvaremus et ad omnem utilitatem vel commodum nostram eis operam impenderemus Itaque hic vobiscum hodie presentes altare primum et majus cum ceteris que parata sunt novi hujus Monasterii sacramus et ad eam que de eodem Monasterio restat structuram vestros animos incitamus Placet etiam nobis vobisque placeat suademus [nam hoc ipsum et bonum videtur et justum] huic loco qui vobis et ceteris Christianis in veneratione et cura bona habendus est quosdam certos limites immunitatis ac securitatis circum circa undique assignare ipsosque limites sacri boni infra quos terminos nullus homo cujuscumque conditionis ac potestatis unquam invasionem aliquam grandem vel parvam aut incendium aut predam aut rapinam facere aut hominem rapere vel per iram ferire aut quod multo gravius est homicidium perpetrare vel truncationem membrorum hominis sacra authoritate arcente ullatenus audeat aut audendo pertentet Itaque termini sacri banni sunt hi Versus Berziacum terminus est ad bivium citra Sarratam unde una via venit ad Cluniacum altera ad Masilias In strata versus Bellumjocum terminus est contra Quarruvium quod est desuper molendinum Cellerarii Cluniacensis citra Viengias Ultra Cluniacum versus Masilias terminus ad bivium unde una via tendit ad Masilias altera ad sanctam Mariam de Bosco Super Rufiacum terminus est ad summitatem defensi ad bivium unde una via tendit ad Bezorniacum altera ad Carellam Versus Sergiacum terminus est intra Quarruvium citra locum ubi dicunt ad Turgum In Strata versus Cabilonensem pagum terminus est ad grossam Cassaniam super Marziacum Versus Brancedunum terminus est in via super Boscum Bannedum Versus Trinorchium terminus est super rivulum quem dicunt longam aquam inter Blanoscum et Donziacum Versus Perronam vel Laziacum terminus est ad tres fagos ubi partiuntur noster boscus de Cluniaco et boscus Comitalis Versus Igiacum terminus est ad Carmos super montem medium Nos igitur terminos sacrati banni huic Monasterio Cluniaco et ville ac burgo pariter prefigimus hos limites plena certitudine assignamus precipientes in nomine Domini Dei omnipotentis et authoritate beatorum Apostolorum Petri et Pauli universos vos atque omnem hominem qui hec lecturus vel auditurus est contestantes ut bannum hunc scienter non infringatis ut ejus legem et singuli et omnes teneatis Si quis vero eam in uno horum que supra verita sunt scienter infregerit et ab Abbate vel Priore vel Camerario vel Decano Cluniensis Conventus et sicut visum fuerit ab eis induciatus congrua satisfactione non emendaverit jam tunc quisquis ille fuerit excommunicationi subjacebit Etiam si qui vestrum contra illum talem ab Abbate vel fratribus interpellati fuerint coercere eum et ad emendationem urgere debebunt Excommunicatus autem pro banno fracto ubi emendationem congruam fecerit absolvatur Lex autem banni hujus non vobis solis ponitur qui presentes estis sed et cunctis absentibus et filiis et posteris vestris Sed jam finem rei pro qua nunc satagimus videamus Omnes igitur loco huic Cluniaco malefacientes et contra congregationem istam inique agentes anathemate digni erunt et beati Petri gladio feriendi usque ad emendationem congruam Omnes autem loco huic Cluniaco benefacientes et erga congregationem istam recte agentes pacemque servantes gratiam et misericordiam Christi Domini Dei nostri consequantur perpetuam et beatos Apostolos Petrum et Paulum primos et precipuos adjutores habeant apud Deum Amen