Charter Document - 02183685
| Charter Number: | 02183685 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Judgement |
| Date: | 1094 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Noverit tam presentium quam posterorum prudentia quod domnus Joscerannus prior culpavit Unbertum prepositum de injuriis quas faciebat beato Petro jussu domni Hugonis abbatis id est de terris quas ultra feodum suum occupaverat et de terris quas emerat sine laude domni abbatis de servis beati Petri et de terris quas Pontius frater suus beato Petro donavit quas injuste auferebat et de terra burgi que juris erat Sancti Petri in qua domum suam construxerat et de contumeliosis verbis et inhonestis responsis que contra fratres nostros dominos suos habuerat Propter has injurias et propter alias venit in judicium et judicatum est ut tam feodum quam allodium suum et omnem censum et se et filios suos redderet in misericordia fratrum et se deinceps nullatenus intromitteret nisi quantum ei misericordia fratrum concederet Judices autem fuerunt Lambertus cognomento Discalciatus Gaufredus Cluniacensis Hugo de Mediolano villa Ansedeus de Oulato Hugo Burdinus qui cum eo ad placitum venerat Ad hec prior respondit se nequaquam velle cujuslibet reverentie causa talia dici vel fieri nisi justo judicio propter querelas illas que ibi fiebant hoc posset astrui Assensere omnes ita justum esse propter querelas illas unde se exculpare vel quibus contradicere non poterat Postea ipse Unbertus in commune vocatus interrogatus est a priore utrum laudaret judicium Quod ipse cum filiis suis laudavit Post hec quesivit prior ut daret fide jussores ut ita teneret tam ipse quam filii sui sicut judicatum erat quod et fecerunt Ansedeum videlicet et Gaufredum Inprimis tamen dederat Bernardum Constantinum et Warnerium Bilonem Postea quesivit misericordiam et fecerunt ei misericordiam domnus abbas et fratres talem ut res quas habebat antequam placitum istud inciperet permitterent ei solummodo in vita sua excepta condamina de Sancto Odilone et donis et vendicionibus de plastris burgi Cluniacensis Hec autem vuerpivit per quendam lapidem in manu prioris domno abbati cum laude et assensu filiorum suorum Prior vero fide jussores predictos retinuit ut si aliquando vel ipse vel filii sui calumpniam vel inquietudinem huic vuerpitioni inferre temptarent a fidejussoribus quereretur