Charter Document - 02183684

Urbanus episcopus servus servorum Dei Duranno charissimo fratri Arvernorum episcopo salutem et apostolicam benedictionem Adversus fraternitatem tuam pro Biliomensibus canonicis qui tue ditionis habentur non exigua querela provenit Hi nimirum Beati Lupi cenobium quod sub Cluniacensis cenobii jure multis jam ultra nostram memoriam temporibus est retentum invasione horrenda et catholicis auribus non ferenda contra omne jus et fas usurpantes altare ipsius cenobii diruerunt reliquias in eo latentes diripuerunt quodque dictu et auditu nefas est ipsum quod super altare ad infirmorum usus repositum fuerat corpus Dominicum ipsis supercelestibus virtutibus reverendum humo dispergere minime timuerunt et cetera ornamenta omnemque monasterii supellectilem in usus proprios asportaverunt Hec quam gravia quam horrenda quam catholicis auribus importabilia videantur fraternitatis tue non credimus latere prudentiam Quomodo igitur inulta hec pati sollicitudo tua poterat non minimum si ita se rei veritas habeat admiramur Presentibus ergo litteris officii tui debitum admonemus ut predictum locum et ex eo direpta utensilia universa Celsiniacensibus restitui facias quibus reinvestitis si quam in loco illo justitiam se habuisse canonici Biliomenses confitentur tempore congruo cum Celsiniacensibus monachis nostro se conspectui representent Si autem nostre huic jussioni Biliomenses canonici obedire contempserint divinum iis officium interdicito quoadusque resipiscentes Celsiniacensi preposito et fratribus que diripuerunt restituant Quod si episcopalis auctoritatis judicium neglexerint nostra se a divinis officiis auctoritate noverint interdictos ut nec ipsi uspiam nec alii in eorum ecclesia id exhibere presumant quoadusque hec a nobis precepta perficiant Urbani II epistola ad Guillelmum comitem Tolosanum Illum de expulsis abbatibus Moissiacensi et Lesatensi objurgat