Charter Document - 02173594
| Charter Number: | 02173594 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1082 |
| Date type: | Internal, A.D. |
| Resource Link(s): |
TELMA - Traitement électronique des manuscrits et des archives CCE: cartae cluniacenses electronicae |
Charter:
Dominus ac Redemptor noster cupiens humanum genus a laqueis diaboli a quo per culpe sue meritum homines captivi tenebantur misericorditer liberari cum eos propriis viribus sciret minime posse salvari contra peccatorum nostrorum mortifera contagia preceptorum suorum obponere dignatus est salutifera medicamina inter que duo in sacris eloquiis clarescunt eximia que principaliter ad obtinenda regna celorum Dominus ammonet dicens Facite vobis amicos de Mamona iniquitatis qui vos recipiant in eterna tabernacula et Facite elemosinam et ecce omnia munda sunt vobis [] Que Domini mandata nos fratres sive propinqui scilicet Guigo et Hysardus et Ainardus [] et Wilelma et filius suus Wilelmus et Avierna et Borno et filii sui Borno et Rostagnus [] et Petrus et Umbertus et Bernardus et Petrus Brunus [] explere cupientes donamus omnipotenti Deo et sanctis apostolis ejus Petro et Paulo ad locum Cluniacum ubi domnus Huguo abbas magis videtur prodesse quam preesse videlicet ecclesiam Sancti Petri et Sancti Marcelli que sunt site in loco qui vocatur Alavardus ad hoc ut ibi monasterium fundetur cum primitiis et partem tertiam decimarum seu oblationibus et elemosinis[] Facimus autem hoc donum pro salute animarum nostrarum et omnium propinquorum nostrorum vivorum sive defunctorum quatinus meritis sanctorum apostolorum et monachorum Cluniensium orationibus ita in hoc seculo Deo placere possimus ut in futuro gaudia eterna habere mereamur Amen [] Hec carta facta est anno ab incarnatione millesimo LXXXII Si quis autem malo spiritu excitatus sive propinquorum nostrorum seu extraneorum in hoc dono et elemosina a nobis facta aliquid [quod absit] inquietare aut calumniare presumpserit nullatenus adipisci valeat quod male quesierit et si forte aliquod dampnum ingesserit predicti apostoli claudant ei januas Paradisi nisi ad emendationem congruam venerit aut digne veniam petere studuerit alias vero sit anathema maranatha