Charter Document - 02173459

Gregorius in Romanum pontificem electus Giraldo Ostiensi episcopo et Raimbaldo subdiacono in legatione Gallie constitutis salutem in Domino Jesu Christo Rumorem obitus domini nostri Alexandri pape qui XI kalendas maii spiritum Deo reddidit et nostre promotionis famam jam ad vos pervenisse credimus sed eadem plene vos cognoscere cupientes ad certissima eorum indicia aptiorem hoc dilecto filio et cardinali sancte Romane ecclesie presbytero qui ambobus interfuit in partes illas mittendum nostrorum nomine judicavimus Itaque quid et qualiter de utroque factum sit per hunc mera veritate percognita ut orationes ad Deum fieri solicite procuretis caritatem vestram valde rogamus quatenus et illius animam ad gaudia eterna beatitudinis transferat et nobis ad ferendum onus impositum auxilium sue miserationis impendat Quia vero hunc confratrem nostrum videlicet Ugonem Candidum in partes illas dirigi tempus et rerum competentia postulasse videbatur prudentiam vestram omnino exoratam esse volumus quatenus Ugonem Cluniacensem abbatem et totam congregationem fratrum ita ad pacem et integram hujus dilectionem flectere et conjungere studeatis ut auxiliante Deo nihil in eorum mentibus quod invisum aut dissensionis nube sit obtectum relinquatis Nam et hic abjecto omni arbitrio suo ad cor nostrum nostraque consilia rediens in eodem sensu eademque voluntate ac studio nobis est connexus et ea que antehac sibi imposita sunt vivente adhuc domino nostro papa ex aliorum magis quam ex ejus culpa prodiisse cognovimus Preterea hec meminisse debetis quod in litteris domini nostri beate memorie Alexandri et nostra quoque legatione orati et commoniti fuistis quatenus cause Evuli comitis de Roceio per vos et per antedictum abbatem favorem addere insisteretis et cognita pactione quam nobiscum de terra Hispanie pepigit in scripto quod sibi dedimus una cum consilio abbatis tales illuc personas dirigi procuraretis qui et errorem Christianorum qui ibi reperiuntur in spiritualibus corrigere saperent et in exquirendis causis sancti Petri juxta tenorem pactionis si res bene procederet sat idonei forent Quod si ita factum est nobis multum placet sin vero adhuc aliqua occasione pretermissum est aut etiam si eadem conventio ab aliis quibusdam principibus quos in eandem partem seorsum ab Evulo suis copiis ituros intelleximus nondum exquisita est volumus ut cum vestro consilio et abbatis Hugo cardinalis illuc tendat et equam ab omnibus ex parte sancti Petri pactionem et debitum exigat Vos autem ex nostra parte rogate abbatem ut tales sibi adjungat qui eum comitentur quorum consilio et adjutorio iter et laborem illum fiducialiter aggredi possit legatione tamen in eo principaliter posita Extra Hispaniam vero nullius unquam publici rerum ecclesiasticarum negotii sine vestro consensu quandiu vos in Gallia fueritis licentiam sibi dedimus faciendi Ceterum de mora vestre reversionis valde miramur presertim cum jam redire commoniti in tanta vestri reditus expectatione ne morarum quidem nobis causas indicastis Unde dilectionem vestram admonemus ut quantocius possitis ad nos revertamini quatenus et quid egeritis cognoscamus et de cetero consultius adjuvante Deo statuere valeamus Preter hec jam sepe memoratum abbatem specialiter commoneri et plurimum a vobis vice nostra exorari cupimus quatenus caritatem quam hactenus in nos habuit nunc cum maxime opus est indefessa exhibitione conferat et infirmitatem nostram suis et sanctissime congregationis sue orationibus tanto subnixius adjuvare studeat quanto imbecillitatem nostram sub accumulata pondere gravius premi non ignorat Data Rome secundo kalendas maii indictione undecima