Charter Document - 02173451
| Charter Number: | 02173451 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1079 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Gregorius episcopus servus servorum Dei dilectis in Christo Massiliensis congregationis fratribus salutem et apostolicam benedictionem Non dubitamus fraternitatis vestre dilectionem meroris et tristitie plenam super venerandi Patris sui excessu vehementi dolore constringi de cujus transitu profecto memini majus incommodum quam nobis aut eque magnum evenisse putamus qui talem tantumque adjutorem nobis e latere subductum sentimus Intelleximus siquidem in ipsis prudentia et consilio si vita aliquandiu comes maneret plurimum utilitatis Deo favente non solum in Transalpinis verum etiam in Italie partibus cum multorum salute sancte Romane Ecclesie perventurum Unde nos quoque tanti culminis onus quod ultra vires est sustinentes ejusmodi solatio sublato cum neminem aut vix paucos suffragatores similes inveniamus quanto mentis angore teneamur liquido quidem potestis et ipsi perpendere Verum quia omnipotentis Dei inestimabilis providentia omnia juste et sapienter disponit judicia ejus nimirum recta consilia ipsius equitatis et misericordie plena nobis sunt fratres equanimiter ferenda Et quoniam memoratus Pater vester quod vivendo promeruerit obeundo incunctanter est Abrahe sinu receptus nos dulci illius memoria a vobis stricti precipue etiam divino amore monente locum vestrum specialiter diligere juvare et ab omnibus violentiis sicut Ecclesie Romane specialiter herentem defendere decrevimus et quemadmodum Cluniacense monasterium longo jam tempore sedi apostolice constat esse unitum ita quoque vestrum deinceps ut eidem sedi similiter hereat in perpetuum volumus atque sancimus Audivimus autem quod charitas vestra filium nostrum et presbyterum cardinalem Richardum loco germani ipsius in abbatem velit eligere quam denique electionem nos approbamus et apostolica auctoritate firmamus in hoc item vobis obnoxii et quasi vinculis geminatis annexi quod sancte Romane Ecclesie filium rectorem vobis appetitis Oportere igitur arbitramur omnium bonorum dispensatorem exorare quatenus ipsum eum saluti vestre ita vigilantem provisorem efficiat ut is pro salubri cura et talentis multiplicatis eterne hereditatis dona percipiat et premia beata reportans matrem suam letificet Data Roma quinto Nonas Novembris indictione tertia