Charter Document - 02173414

In nomine Dei summi omnipotentis Patris et Filii et Spiritus Sancti Ego Aimericus Ausensis comes et frater meus Bernardus pro peccatis nostris et Willelmi patris nostri et antecessorum nostrorum et omnium parentum nostrorum vivorum et mortuorum donamus Domino Deo et sanctis ejus apostolis Petro et Paulo ad locum Cluniacum cui domnus Hugo abbas preest monasterium Sancti Orienti et quicquid modo possidet et in futuro possidebit et hoc donum simul fecit domnus Raimundus avunculus noster dictus abbas ejusdem loci et alter avunculus Arnaldus prepositus ejusdem sedis Unde rogamus per omnipotentem Deum tam presentes quam succedentes ut hoc donum collaudent et integrum et illibatum custodiant ut gratiam Dei adquirant et in societatem Cluniensium fratrum quam pro hoc dono suscepimus participes fiant Si quis autem hoc donum calumniare vel temerare presumpserit quod apetit non perficiat sed iram Dei incurrat et cum Datan et Abiron absortus intereat et hoc volumus et rogamus ut hoc donum apostolica dictione confirmetur ut si quis destruere voluerit auctoritate beati Petri apostoli distringatur donec resipiscat Facta est autem hec carta mense novembri in claustro ejusdem monasterii Sancti Orienti in presentia domni Hugonis abbatis Cluniensis et domni Duranni Tholosani episcopi et Willelmi episcopi Convenarum Raimundi episcopi Lacturiensis domni abbatis Sancti Genii Willelmi abbatis Sancti Martini regente apostolicam sedem domno Alexandro summo pontifice Philippo rege regnum Francorum gubernante et desuper regnante cujus regnum et imperium sine fine permanet in secula seculorum Signum Aimerici comitis et Bernardi fratris ejus Signum avunculorum eorum Signum Raimundi et Arnaldi Signum Arnaldi prepositi Agennensis Signum Raimundi de Monte et fratrum ejus