Charter Document - 02173389

Alexander Episcopus servus servorum Dei dilectissimo filio Hugoni Abbati Monasterii quod dicitur Cluniacum in honore beatorum Apostolorum Petri et Pauli consecratum in comitatu Matisconensi situm et per te cunctis successoribus tuis Abbatibus in perpetuum Cum omnium fidelium petitionibus et necessitatibus subvenire debeat Apostolice charitatis gratia multo magis his est impertienda ejus beneficii clementia quos singulariter proprios ac specialiter se gaudet filios habere sancta Romana mater Ecclesia et sue utilitatis gratia et precedentium Patrum authoritate egregia Quorum etiam desideriis et votis eo plenius parere debet authoritas Apostolice sublimitatis quo certius constat eos nonnisi illa desiderare et expetere que sunt ad honorem sancte pietatis et utilitatem vere religionis Et quoties in sue necessitatis commodis nostrum assensum et solite Apostolice authoritatis studuerint humiliter requirere presidium ultro benignitatis intuitu nos convenit subvenire et rite pro magna securitate solidare ut ex hoc nobis potissimum premium a conditore omnium Deo in sydereis arcibus conscribatur et ideo quia postulasti a nobis ut prefatum Monasterium Apostolice authoritatis serie muniremus et omnia ejus pertinentia perenni jure ibidem inviolabiliter permanendo confirmaremus et absque omni jugo seu ditione cujuscumque persone constabilire nostri privilegii pagina studeremus Propterea tuis flexus precibus per hujus nostre authoritatis privilegium statuentes decernimus ut cuncta loca et monasteria ad supra dictum Cluniacum Cenobium pertinentia que ab aliquibus fidelissimis Christianis Regibus Episcopis Ducibus seu Principibus eidem loco sunt concessa et ab antecessoribus tuis Abbatibus adquisita Bernone videlicet Odone Eymardo et beate recordationis sancto Majolo et bone memorie Odilone predecessore tuo vel quecumque ad eundem locum pertinere videntur absque ullius contradictione cum magna securitate quietus debeas possidere et per te universi successores tui in perpetuum Necnon sub divini judicii promulgatione et confirmatione et anathematis interdictione corroborantes decernimus ut nullus Episcopus seu quilibet Sacerdotum in eodem veniat Cenobio pro aliqua ordinatione sive consecratione Ecclesie Presbyterorum vel Diaconorum Missarumque celebratione nisi ab Abbate ejusdem loci invitatus fuerit venire ad agendum presumat Sed liceat Monachis ipsius loci cujuscumque voluerint ordinationis gradum suscipere ubicumque tibi tuisque successoribus placuerit Interdicimus autem sub simili anathematis promulgatione ut isdem locus sub nullius cujuscumque Episcopi vel Sacerdotis deprimatur interdictionis titulo seu excommunicationis vel anathematis vinculo Non enim patitur sancte Sedis Apostolice authoritas ut ullius cujuscumque persone obligatione proscindatur a se cuilibet concessa liberalis libertas neque ipsius loci fratres ubicumque positi cujuscumque Episcopi maledictionis vel excommunicationis vinculo teneantur adstricti Inhonestum enim nobis videtur ut sine nostro judicio a quoquam anathematizetur sancte Sedis Apostolice filius veluti cujuscumque subjecte Ecclesie discipulus Si qua vero competens ratio adversus eos quemquem moverit et hoc aliter determinari et diffiniri nequiverit judicium Apostolicum quod nulli prejudicium pretendere patitur super hoc patienter prestoletur et humiliter requiratur Decernimus etiam et illius cujus vice quamvis indigni fungimur authoritate sancimus ut isdem locus omnibus ad se ob salutem confugientibus sit misericordie sinus sit totius pietatis et salutis portus Obtineat in eo locum justus nec repellatur penitere volens iniquus Prebeatur innocentibus charitas mutue fraternitatis nec negetur offensis spes salutis et indulgentia pietaris Et si aliquis eundem locum expetierit sue utilitatis et salutis gratia minime a venia et optata misericordia excludatur sed oleo medicamenti salutaris fovendus benigniter colligatur quia et justum sic est ut in domo pietatis et justo prebeatur dilectio sancte fraternitatis et ad veniam confugienti peccatori non negetur medicamentum indulgentie et salutis Sit autem omnibus ibi advenientibus causa salutis hic et in perpetuum divine miserationis et pietatis refugium et Apostolice benedictionis et absolutionis presidium Decernimus preterea et omnino constituimus ut predicti loci obeunte Abbate non ibi alius cujuscumque persone violentia constituatur ordinandus sed ab ipsa congregatione loci secundum timorem Dei et institutionem Legislatoris Benedicti pater qui sibi preesse debeat eligatur et ad eum ordinandum qualiscumque illis placuerit Episcopus advocetur Quascumque vero terras nunc tenes et quas tu tuique successores acquirere potueritis in perpetuum possidendas concedimus vobis Si quis autem temerario ausu quod fieri non credimus contra hujus nostre Apostolice confirmationis seriem venire aut agere tentaverit sciat se Domini nostri Jesu Christi et Apostolorum Principis Petri anathematis vinculo innodatum vel innodandum et cum diabolo ejusque atrocissimis pompis atque cum Juda traditore Domini Salvatoris nostri Jesu Christi in eternum ignem concremandum simulque in voraginem tartareumque chaos demersum cum impiis deficiendum Qui vero custos et observator hujus nostri privilegii extiterit benedictionis gratiam et vitam eternam a Domino consequatur Datum in sacro Lateranensi Palatio vi Idus Maii per manus Petri sancte Romane Ecclesie Subdiaconi et Cancellarii vice Domni Aimonis Coloniensis Archiepiscopi anno secundo Domni Alexandri Pape ab Incarnatione Domini nostri Jesu Christi millesimo sexagesimo tertio indictione prima