Charter Document - 02173388

In nomine sancte et individue Trinitatis Patris et Filii et Spiritus sancti Ad noticiam posterorum notis memorie litteris adsignamus qualiter olim quoddam oratorium in honore nativitatis filii Dei Salvatoris nostri Jesu Christi et beate Marie semper virginis matris ejus necnon et beati Stephani prothomartyris Christi ac beati Johannis evangeliste dilecti Domini et sanctorum Innocentium dedicatum quorumdam nefaria impietate percussum et adnichilatum statum maxime dignitatis amiserit non reminiscentium illius Davitici psalmi Deus meus pone illos ut rotam et sicut stipulam ante fatiem venti qui dixerunt hereditate possideamus sanctuarium Dei et cetera Qui minus spiritaliter et nimis carnaliter sapientes res ecclesie scilicet sacrifitium in sacrilegium retorserunt ad laicorum usum quibus quia plurimum lacrime debemus quam culpe minus sue crudelitati dabimus proloquium vir namque beate vite Columbanus abbas de talento a Domino sibi credito ne sine lucro redderet semper sollicitus premeditabatur duplicare in usura fidei quod se redditurum non ignorabat austero judici unde ne torporis ignavia dampnaretur a Domino se ipsum spiritale templum divine fecit gratie et per multarum terrarum spatia quam plurima Deo edificavit templa Quorum unum hoc de quo prelibavimus legimus illum fundasse in suburbio Nivernis civitatis in quo unicuique suprascripte venerationi suum singulare ac marmoreum altare consecravit sicuti adhuc presens dies indicat nobis decoravit quidem ipsam ecclesiam honestate parietum et conpositione marmorearum piramidum quod et vetustate consumitur et residuum igne comburitur thesaurizavit vero illic auri et argenti et lapidis pretiosi ac diversi ornamenti copiam quod sacrilege manus in infernum deportaverunt et que diversarum gazarum supplebatur copia ecce ligni et lapidis premitur indigentia adgregavit ergo inibi beatus Columbanus sanctarum monialium collegium que regule subjacerent et contemplative vite desudarent Illis autem obeuntibus et ceteris earum subsequacibus per multorum annorum curricula ad tantam inopiam reversus est locus ut qui plurimorum benefitiorum stipendiis ditatus fuerat et a multis ibi Deo servientibus totius corporis penuriam abigebat nunc solius hominis vite necessaria procul abnegat quamvis enim auctentica dicat Scriptura Qui altari deservit cum eo participet tamen nemo ei participat quod nichil habet istud namque altare peccatis nostris exigentibus adeo spiritali adnichilatur obsequio et terreno privatur benefitio ut non sit qui sibi serviat vel si esset qui ejus servituti vacaret profecto unde viveret non haberet nisi aliunde quereret Qua de re ego Hugo gratia Dei Nivernensis episcopus intimo dolore cordis tactus et mentis conpassione conpunctus lacrimabili voce querimoniam hujus loci ante oculos Dei sepius fudi et obnixe deprecatus fui ut statum hujus sancte ecclesie mihi commisse idem Dominus Deus ad honorem sue laudis relevando revocaret quoniam mei offitii est jus ecclesiasticum procurare et quod bene constitutum est ne proruat providere et quod dissipatum depravatur in melius redintegrare Cum vero in hac orationis frequentia meus incessanter animus perseveraret venit quidam clericus nomine Hugo nepos meus nostreque ecclesie decanus qui medietatem hujus olim abbatie nunc jam nec abbatie nec pene ecclesie habebat a fratribus meis qui eam tenebant a comite domno videlicet Wilelmo in benefitio dicens se invenisse secundum fragilitatem seculi boni testimonii clericos qui irriguum inferius quod est timor inferni gehene et irriguum superius quod est amor Dei secundum suam possibilitatem in hac basilica libenter procurassent Unde cum de consolatione ecclesie quod volebam audirem domnum Wilelmum comitem regali genere natum et magnificum virum qui hujus loci altaria ex episcopali dignitate tenebat et fratres meos Hugonem vicecomitem atque Leonem more episcopali exorando monui et monendo deprecatus fui ut in hac fabrica pietatis manum mitterent et in restauratione corporis ecclesie corpus peccati pro certo destruerent qui ut sapientes mee saluberrime exortationi bono animo adquieverunt et auxiliante Deo ut in unum omnium nostrum convenit sententia canonicum ordinem in hac ecclesia esse semperque fore decrevimus his vero fratribus quos hic in Dei nomine et canonico ordine congregamus beati Silvestri pape Romani regulam tenentibus hanc pauperrimam ecclesiam ab omni servitutis nodo solutam pro Dei amore concedimus indignum enim valde judicamus ut que est sponsa Dei et mater nostra nobis ad serviendum sit subjecta Quapropter et ut melius et securius edificent et in ea laborando desudent et de suis proprietatibus eam honorando amplificent illis et omnibus posteris eorum hanc cartam perpetualiter firmamus et adstipulando in infinitum firmissime corroboramus Nos ergo auctoritate divina solidati que vendentes et ementes flagellando de templo ejecit omnino prohibemus et excommunicamus ne prebenda hujus loci vel aliquid ecclesiastice dignitatis alicui vendatur seu ab aliquo ematur neque Symon Magus hic lucrande cupiditatis evacuet sacculum nec Judas traditor Domini mercator pessimus denuo vendat Christum sed procul omnino exclusa totius pecunie nequitia frater probabilis vite a ceteris eligatur et inmunis illis jungatur Et qui in hac congregatione voluerit esse major secundum Dei preceptum sit illorum servus et ministrator ipsi vero fratres ex se ipsis cum deprecatione Dei priorem eligant qui illis presit canonice verbo et opere et totius mentis intentione in Dei nomine vehementer prohibemus ut neminem huic congregatione adjungat nisi illum quem ceteri fratres idoneum estimatum presentaverint frater quoque adjungendus veluti in proximo moriturus qualiscumque sit dives seu pauper sapienter diffiniendo sua dividat et deinceps memor Ananie et Saphyre qui non ex alieno sed ex suo perierunt proprietatem non habeat Igitur ego Wilelmus comes memor Salomonis dicentis Divitie viri redemptio ejus pro salute anime mee et omnium parentum ac fidelium meorum reddo ac concedo omnipotenti Deo et Sancte Marie adque beato Stephano ceterisque sanctis ibi veneratis et canonicis ibidem servientibus ac servituris per laudationem domni Hugonis episcopi ac domni Gosfridi Autisioderensis presulis necnon matris mee et uxoris mee et filii mei Raginaldi et ceterorum filiorum meorum Wilelmi atque Rotberti et filiarum mearum et Hugonis vicecomitis et fratrum ejus Leonis et Raginaldi quibus hoc benefitium ex me descendebat hospitalitates hominum et equorum et justitiam omnium hominum ibi manentium omnemque consuetudinem hujus abbatie quam ibi habebam omnes quoque terras tam adquisitas quam adquirendas quascumque ad suum commune proficuum revocare poterunt reddo et dono et laudo et omnibus fidelibus meis laudare fatio Et ut hec carta firma stabilisque et inconvulsa permaneat manibus et nominibus nostris eam firmamus Actum est civitate Niverni III nonas martis indictione XV anno ab incarnatione Domini millesimo sexagesimo tertio regnante Philippo rege annos III regimen sancte Romane ecclesie gubernante Alexandro papa annos II Signum domni Richerii Senonensis archiepiscopi Signum domni Hugonis Nivernensis episcopi Signum domni Gosfridi Autissioderensis episcopi Signum Hugonis decani Signum Malguini archidiaconi Signum Gosfridi thesaurarii Signum Odonis cantoris Signum Gosberti editui Signum Ragenardi abbatis Signum Rannulfi presbiteri Signum Odonis presbiteri Signum Rodulfi presbiteri Signum Galdini diaconi Signum Rodulfi diaconi Signum Landrici diaconi Signum Rocleni subdiaconi Signum Agmardi subdiaconi Signum Hervei subdiaconi Signum Falconis subdiaconi Signum Guilelmi comitis Signum Ragenaldi filii ejus Signum Guilelmi filii ejus Signum Rotberti filii ejus Signum Hugonis vicecomitis Signum Leonis fratris sui Signum Ragenaldi fratris eorum Signum Frotmundi militis Signum Rotberti militis Signum Ragenaldi militis Signum Landrici militis Signum Falconis militis Signum Gosberti militis Signum Eldradi militis Signum Bernardi militis Signum Ragemundi prepositi Odo cancellarius scripsit mense martio Ad laudem Sancte firmatur carta Marie