Charter Document - 02173383
| Charter Number: | 02173383 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1062 |
| Date type: | Internal, A.D., Regnal |
| Resource Link(s): |
CCE: cartae cluniacenses electronicae |
Charter:
Noverint omnes sancte matris ecclesie filii ac fideles tam presentis quam futuri temporis quod ego Ademarus vicecomes Lemovicensis domno Hugoni abbati Cluniacensis monasterii omnibusque successoribus ejus abbatibus qui idem monasterium Cluniacense regulariter gubernabunt dono et trado abbatiam Sancti Martialis Lemovicensis cum consensu et auctoritate domni Iterii ejusdem civitatis episcopi canonicorumque ejus necnon et conjugis mee Umberge filiorumque meorum et obtimatum ob indulgentiam peccatorum nostrorum et parentum nostrorum et maxime eorum que de eadem abbatia contraximus consentientes monachos ibidem degentes non secundum regulam Sancti Benedicti vivere et animarum regimen symoniace ementibus abbatibus vendentes Quam heresim cum ab initio nascentis ecclesie beatus Petrus apostolorum princeps in ipso suo capite extinxerit nuper tamen sanctus Leo papa et omnes deinceps ejus successores perpetuo anathemate dampnaverunt Penitens igitur preteritorum excessuum meorum et confidens ejusdem abbatis successorumque ejus industria eandem abbatiam Sancti Martialis ad regularem tramitem posse reduci et detestabilem heresim symoniacam Deo adjuvante funditus expelli dono et trado predictam abbatiam prefato Hugoni abbati omnibusque successoribus ejus abbatibus regulariter viventibus deinceps perpetuo possidendam et abbates quos eidem loco tam ipse quam successores ejus prefecerint si [quod absit] pro mala conversatione removendi fuerint ipse et successores ejus eos submoveant et meliores substituant absque contradictione ullius hominis nihil in eadem abbatia neque ego neque successores mei retinendo exceptis his consuetudinibus CC solidis ad vindemiam colligendam in festivitate sancti Aredii reddendis et sagmario in hostem prestando cum famulo qui sagmarius hoste transacta monasterio reddatur et uno recepto comitis Pictavensis per jussionem vicecomitis et justicia panis et vini cum in hanc villam venerit Eo tenore ut hanc donationem et traditionem omnes successores mei confirment et hanc ipsam kartam laudent et auctorizent et hec traditio nostra ut stabilis et inconvulsa permaneat apostolica auctoritate firmetur Quod si ego aut successorum meorum aliquis hanc traditionem infri[n]gere aut contradicere voluerit iram Dei omnipotentis et anathema perpetuum incurrat et prefatus Hugo abbas et successores ejus apud ejusdem civitatis episcopum et omnes cristianos et precipue apud sedem apostolicam potestatem habeat reclamandi Facta est autem hec traditio in urbe eadem Lemovicensi anno incarnationis Dominice MLXII indictione XV regnante Philippo Francorum rege anno II cujus traditionis confirmatores et consignatores et testes hi sunt in primis Iterius episcopus signavit Ademarus vicecomes signavit cum IIII filiis suis et uxor ejus Umberga