Charter Document - 02173304
| Charter Number: | 02173304 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1049 - 1109 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
In nomine Domini Dei summi Noverint fideles cuncti presentes et futuri quod ego Stephanus de Oblaco peccatorum meorum pondus perpendens et de his eterni judicis discussionem pertimescens ut aliquam requiem in die ultimi examinis inveniam dono Deo et beatis apostolis Petro et Paulo Cluniacensique monasterio cui preest pariter et prodest reverendus pater domnus Hugo omnem hereditatem meam in pago Matisconensi in villa Oblaco sitam id est totius hereditatis partem quartam que mihi obvenit hereditario jure facta cum tribus fratribus meis divisione Hanc ergo hereditatem cum omnibus ad ipsam pertinentibus id est domibus edificiis vercariis campis silvis vineis pratis pascuis molendinis aquis aquarumque decursibus terris cultis et incultis cum omni integritate dono Deo et prefatis apostolis Petro et Paulo pro anime mee et omnium parentum meorum vivorum et defunctorum et omnium christianorum remedio ut partem et societatem mereamur habere in Dei regno et rectores Cluniacensis monasterii eam teneant et jure perpetuo possideant et quicquid voluerint ex ea faciant Si quis autem hanc donacionem calumniare voluerit non vendicet quod requirit sed omni maledictioni et perpetue excommunicationi subjectus Deum et beatos apostolos peccati sui ultores inveniat nisi resipuerit S Stephani qui hoc donum fecit S Willelmi archidiaconi Milonis et Hugonis fratrum ejus S Ansedei avunculi ejus S Gaufredi de Burzi qui habet sororem ejus et aliorum multorum