Charter Document - 02173053
| Charter Number: | 02173053 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1049 - 1109 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Notum sit omnibus fidelibus christianis tam presentibus quam futuris quod ego Stephanus secularis hactenus miles ab hac die inantea soli Deo militare desiderans in Cluniacensi cenobio sancte religionis habitum suscipio et ut a Domino veniam de preteritis peccatis consequi merear dono sanctis ejus apostolis Petro et Paulo et senioribus ejusdem congregationis de hereditario alodo meo loco elemosine aliquam porcionem perpetuo possidendam hoc est dimidia ecclesia et dimidium cimiterium in villa que dicitur Frontenai et quicquid in eadem villa habere videbamur ego et fratres mei totum ex integro sicut pater meus tenuerat planum boscum pratum Et ut hec donatio semper firma et stabilis a nullo penitus vel me vel alio quolibet contradici vel calumpniari possit fratres meos Berardum et Robaldum ad laudandum et confirmandum adhibeo qui et propria manu confirmaverunt et dederunt et in presenti cartula mecum notari et scribi pecierunt Actum est in capitulo Cluniacensi tempore domni Hugonis religiosissimi abbatis S Stephani qui hoc donum fecit S fratrum ejus Berardi et Robaldi