Charter Document - 02172984
| Charter Number: | 02172984 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1049 - 1060 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Notum sit cunctis fidelibus presentibus et futuris quod ego Arduinus miles filius Joscende nobilissime mulieris Cluniacum ad limina apostolorum Petri et Pauli intravi in capitulum fratrum ubi accepta societate et parte omnium que ibi geruntur bonorum dedi eis medietatem condamine que subtus ecclesia beati Baudilii est meam scilicet partem ipsi possidebant jam alteram partem illius condamine dono fratris mei Monaldi quod fecit pro filio suo Wilelmo quem eis nutriendum et perpetuo tenendum tradidit sub habitu Sancti Benedicti Istud equidem donum tali feci convenientia ut pro meorum absolutione peccatorum Deum semper nocte et die exorent et pro redemptione animarum patris et matris aliorumque parentum meorum ut in die juditii misericordiam Domini mereamur invenire Ipsi vero fratres presentaverunt mihi hanc convenientiam facienti sponte et cum bona voluntate de Sancti Petri bono aliquid quod et ego conpulsus precibus eorum suscipere non rennui unam mulam et quindecim solidos Hanc autem cartam ego jussi scribere et posui super altare Sancti Petri die festivitatis illius que vocatur ad Vincula astantibus fratribus Almanno consobrino meo et Aldulfo et Arnaldo maximaque parte fratrum atque Pontio milite Mainerio cognomento et Algiso clerico Domnus abbas Hugo presidebat tunc predictis fratribus et Sigaldus prior rexque Henricus regnabat Si quis vero huic dono meo aliquam calumpniam inferre temptaverit anathema sit iramque Dei incurrat ipsa vero stabilis et firma permaneat Est autem ipsa condamina sita in pago Valentinense juxta castrum quod vocatur Alesio