Charter Document - 02172979
| Charter Number: | 02172979 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Confirmation |
| Date: | 1049 |
| Date type: | Assigned |
| Resource Link(s): |
CCE: cartae cluniacenses electronicae |
Charter:
Quisquis catholicorum pia intentione Deo placere appetit ac ejus mandatis sedulus obsequi et commissorum suorum penitudinem gerere necesse est ei ut quandiu in hoc corpore degit sommopere provideat quod eidem in perpetuum expediat dumque adhuc vacat et donec hodie cognominatur dumque tempus acceptabile et dies salutis instare videntur aurem corporis auditui cordis accommodet et preveniendo faciem Domini in confessione quantalibet valet satisfactione peccata sua bonis operibus expiare studeat Quod ego Otto comes Matisconensis et filius meus Gaufredus perpendentes futurique judicii diem pretimescentes pro remedio animarum nostrarum donamus Deo et sanctis ejus apostolis Petro et Paulo et Cluniacensi cenobio cui preest domnus ac venerabilis pater Hugo aliquid de nostra hereditate que sita est in pago Matisconense in villa Cavaniaco videlicet totum ad integrum sicut Stephanus filius Artaldi tam in jam dicta villa quam in omnibus appendiciis ejus de nobis tenebat in beneficio et nuper moriens licet irrationabiliter suam hereditatem faciens pro elemosina sua delegaverat Sancto Petro Nos vero injuste ipsius donationi contradicentes irritam fecimus Nunc autem pro animarum nostrarum remedio donamus illam Sancto Petro beatoque Paulo quemadmodum supra tenetur adscriptum Sunt autem vinee prata campi silve et unum molendinum supra Graonnam fluviolum secus Roccam Cavernosam que sibi adfinis conjacet Facimus quoque Otto comes et filius meus Gauffridus aliam donationem sanctis apostolis Petro et Paulo et supradicto loco ut quicumque in comitatu Matisconensi sive liber sive servus donare voluerit monasterio Cluniacensi de alodio suo vel feudo aut emptione vel libertate licentiam et liberum ex parte nostra habeat arbitrium Ego enim et filius meus Gaufridus remittimus ipsis cunctis donationem supradicto cenobio facientibus omnem consuetudinem et censum quem nobis ex illis Deo datis terris reddebant ut nos atque ipsi cunctorum a Deo remissionem mereantur habere delictorum et partem omnium que in eodem sancto loco fiunt bonorum Ut autem ista donatio firma permaneat manu propria firmo presentibusque fidelibus meis firmare et laudare precipio Signum Ottonis comitis S Gaufridi filii S Gauzleni episcopi S Adalardi S Bernardi