Charter Document - 02172927
| Charter Number: | 02172927 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1039 |
| Date type: | Internal, A.D., Regnal |
| Resource Link(s): |
BnF Département des Manuscrits - NAL 1498 (f12r) TELMA - Traitement électronique des manuscrits et des archives CCE: cartae cluniacenses electronicae |
Charter:
Legalibus atque antiquissimis instituimur documentis ut si quis per succedentia tempora aliquid eternaliter vult confirmari teli testamento se debet muniri ne ullarum incursione personarum in posterum aliquid valeat impugnari Quamobrem auxiliante in perpetuum Domino nostro Jesu Christo ego Sigibodus scire volo omnibus ecclesie filiis tam presentibus quam futuris qualiter ego cum conjuge mea nomine Woudtona adhuc illa vivente donationem fecimus Sancto Petro loco Cluniacensi ecclesiam que est constructa in honore beatissime Dei genitricis Marie et est sita in pago Genevense in loco qui dicitur Silingiacus cum omnibus dotis et decimationibus ad ipsam ecclesiam pertinentibus Dedimus etiam ibi mansum unum de terra in ipsa villa Silingiaco jacentem cum casale et vinea et prato et silva et quicquid ad ipsum mansum pertinet usque ad exquisitum Hanc autem donationem fecimus per manum domni Odilonis supradicti loci abbatis viri famosissime sanctitatis qui tunc presens affuit Hanc autem donationem nepotes nostri Letto et Sigibodus in tantum confirmaverunt ut etiam ipsi postea aliam donationem facerent et monachis predicti abbatis traderent et per funem signi ecclesie eosdem monacos revestirent insuper et vuirpitionem illis facerent Hanc autem donationem idcirco fecimus ut remedium sit animabus nostris et nostra societas sit in benefactis supradicti loci Cluniacensis et monachi quos ad habitandum ibi delegaverint habeant semper memoriam nostri seu parentorum nostrorum et maxime illorum qui de benefactis suis hoc agere studuerint ut locus ille crescat et amplificetur et cultus Dei ab inibi Deo famulantibus sine querela et murmurio adimpleri valeatur Quod si postea aliquis malignus aliquo tempore istam cartam in aliquid perturbare voluerit sciat se non solum in hoc seculo nihil proficere sed etiam in futuro a Deo et a Sancto Petro dampnandum se esse et ut hec carta firma et stabilis in evum permaneat stipulatione subnixa S Sigibodi qui istam donationem cum sua conjuge et cum suis nepotibus Leutone et Sigibodo fecit et firmare rogavit S Bruchardi testis S Constantini testis S Odolardi testis Ego frater Girardus presbiter et monachus istam cartam rogatus scripsi anno ab incarnatione Domini nostri Jesu Christi millesimo XXXVIIII indictione VII regnante Heinrico rege filium Cunonis imperatoris anno primo