Charter Document - 02172919
| Charter Number: | 02172919 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1037 |
| Date type: | Internal, A.D., Calendar |
| Resource Link(s): |
CCE: cartae cluniacenses electronicae |
Charter:
Cunctis cruore mediatoris Christi redemptis quadrifidoque orbe diffusis maxima ejusdem redemptoris nostri patet karitas largifluaque in omnibus benignitas a mundi namque origine inimico instigante mors introivit in homine a qua multis misericordie sue generibus eripere nos dignatus est omnipotentissimus Dominus inserens etiam multorum genera virtutum in suorum pectora fidelium prebens singulis qui ejus divinis obtemperant monitis regnum superne visionis sed et seva tormenta inique agentibus reddens in penis infernalibus Ego igitur Bernardus privatus exteriore lumine ea que impiis debentur tormenta perti[mescens] consideransque gaudia que adepturos credo facientes ea que sunt salubria abrenuntians presenti seculo adherere cupio Deo et ut possim interioris lumine non carere monasticoque ordini velut potuero submitto ut [in] eternum quemadmodum supradictum est gaudere possim lumine Cedo autem pro mea redemptione cunctorumque parentum meorum salute cum consilio fratris mei Hugonis et uxoris mee Marie et aliorum amicorum meorum aliquid de mea hereditate Domino Deo sanctisque apostolis ejus Petro et Paulo et ad locum qui cognominatur Cluniacus sub tuitione domni Odilonis abbatis constitutum Est autem sita ipsa hereditas in pago Matisconensi in ipso episcopatu in villa Salorniaco medietatem autem de ipsa hereditate quam ibi visi sumus habere ego et frater meus Hugo dono aliam vero medietatem retinet ipse Sunt curtilia campi vinee silve aque pascue cum exitibus et regressibus quesitum ad inquirendum et cursum de uno farinario quartam partem in villa Besorniaco unam perticam de terra arativa in loco qui nuncupatur Duriaco dimidiam partem de uno prato quod habet terminationes ab oriente et occidente aquam currentem Dono etiam dotalitium uxoris mee Marie post discessum ejus in ipsa villa et unam vineam quam concedo uxori mee quandiu vixerit post discessum vero ejus ad Sanctum Petrum deveniat Habet enim terminationes de ipsa hereditate Hec autem omnia dono pro remedio anime mee et patris mei ac matris et fratris mei Hugonis et uxoris mee Marie et omnium parentum meorum et eorum qui laudatores fuerunt hujus donationis mee Si quis vero hujus donationis calumpniator estiterit non vindicet quod cupit sed coactus in fisco puplico auri libram unam componat et nisi cito resipuerit omnibus maledictionibus novi ac veteris subjaceat Testamenti et deinceps firma et stabilis hec permaneat cum stipulatione subnixa S Bernardi qui fieri et firmare rogavit S Hugonis fratris ejus S Marie uxoris ejus S Arlerii S Bernardi de Olsola S Duranni Actum Besorniaco puplice anno MXXXVII ab incarnatione Domini nostri Jesu Christi indictione V regnante Heynrico rege Arnulfus levita recognovit III nonas novembris