Charter Document - 02172907
| Charter Number: | 02172907 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1035 - 1036 |
| Date type: | Internal, Regnal |
| Resource Link(s): |
CCE: cartae cluniacenses electronicae |
Charter:
Dum in hujus pretereuntis vite mutabilitate unicuique mortalium conceditur vivere quia nec momentum unius hore absque aliqua peccati macula valet percurrere sollicitus id operetur id expetat quod sibi in futurum proficere valeat etenim quia transeuntis evi tempus ad instar torrentis pretereundo deficit et deficiendo evanescit illud diuturnitatis et longevitatis tempus omnimodis adquirendum est quod inmutabiliter manet et manendo indeficiens perseverat Ad hujus veri temporis et beate vite premium nullum aliud verius quam elemosine introducit vestigium Hortatur nos ad hec per se ipsam Veritas dicens Facite vobis amicos de Mammona iniquitatis ut cum defeceritis recipiant vos in eterna tabernacula Hoc itaque sollicite perpendens et diligenter considerans ego Hyldinus nomine pondusque proprie infirmitatis et peccatorum pertimescens jam jamque finem vite instare non ignorans facio hanc presentem donationem pro redemptione anime mee omniumque parentorum meorum Deo proprio conditori et redemptori sanctisque ejus apostolis Petro et Paulo et Cluniensi monasterio in eorum honore consecrato cui preest domnus abba Odilo de quadam terra mei juris et proprietatis que sita est in pago Maticensi in agro Alaliacensi et in villa que vulgo dicitur a Jocs et in confinio Cluniacensi determinatur Sunt vero ipsius terre he determinationes a mane terminationem habet de ipsa hereditate a sero et a circio terra Sancti Petri Infra has itaque determinationes quicquid videor habere tam in silvis quam in campis mansionibus et curtilis totum ad integrum confero Deo et predicto monasterio ut ab hodierna die et deinceps in usus monachorum inibi degentium absque ullius contradictione in perpetuum deveniat Si vero ego aut aliquis de heredibus meis vel ulla alia opposita persona huic testamento calumniam inferre temptaverit iram Dei omnipotentis sanctorumque ejus incurrat et convictus judiciaria potestate quod repetit non solum vendicare non valeat verum etiam legibus mundanis subjaceat et auri libram unam persolvat atque hec carta firmum postmodum vigorem in perpetuum obtineat Ut autem magis magisque roboretur manu subterfirmavi testibusque roborandam tradidi S Hyldini qui fieri et firmare rogavit S Walterii Widonis Hildini Humberti Hugonis Wigonis filiorum ejus Facio etiam cum hac presenti donatione perdonationem de illa consuetudine quam mihi faciebant homines Sancti Petri pro pastura qua utebantur in terra de qua presens donatio fit S Attonis Tetberti Tetbaudi Actum Berziaci publice anno V Heinrici regis Francorum Frater Jozaldus ad vicem cancellarii rogatus scripsit