Charter Document - 02162788

Ab omnibus fidelibus recte saneque sapientibus utile judicatur et congruum ut universa negocia que ad Dei cultum et ad incrementum dignitatis ecclesiatice disponuntur ab ipsis suis auctoribus posteritati fidelium testamentis legalibus et litteris commendentur Hac igitur auctoritate premonitus ego in Dei nomine Cluniensis monasterii monachus et presbiter Odilo hujus regionis et patrie advenas et cives per succedentia tempora scire volo et desidero quoniam fratres mei mihi omnibusque nostris amicis inlustrissime dulcissimeque memorie Beraldus Aniciensis ecclesie prepositus et Bertrannus et domnus Stephanus honorabilis senior et vir bone simplicitatis Ebo in quodam suo prediolo pari voto parique desiderio decreverunt construere monasteriolum et secundum sue possibilitatis modulum ad Dei ordinare servicium Sed quidam illorum pro dolor acerbissimis casibus et infortuniis impediti quidam vero natura sorte preventi non potuerunt incipere quod desiderabant perficere Post mortem vero illorum convenerunt mecum filii eorum cum aliis nepotibus meis et consanguineis et pluribus suis fidelibus ceperunt etiam conqueri quod pro excessibus supradictorum fratrum meorum patrum et parentum et seniorum suorum essent acturi vel si aliquid possemus invenire consilium quod eis a Domino prestaret salutare remedium Quod nullum aliud potuimus invenire salubrius vel consequentius nisi ut illud ipsum studeremus incipere et secundum nostrum posse perficere quod ipsi nobis reliquerunt in deliberatione videlicet ut ad votum illorum in aliquo suo prediolo edificemus monasterium et secundum nostrum posse ad Dei ordinemus servitium Hoc etenim consilio definito et ab omnibus nostris amicis et vicinis alacribus vocibus conlaudato incepimus edificare ecclesiam in quodam proprii sui juris monticulo qui Volta vocatur eo quod preterfluentibus aquis Hylaris fluminis partibus ex tribus concluditur et ut ita dicam quasi sinuatim involvitur Post peractam vero aliquantam partem edificii cum consilio fidelium vicinorum decrevimus in ipso edificio oratorium consecrare a domno Stephano Arvernorum episcopo venerabili Quod et factum est XVIII kalendas octobris in exaltacione Dominice crucis et passione beati Cornelii pape et beatissimi Cypriani victoriosissimi martyris In ipsius namque oratorii consecrationis die ego in primis frater Odilo una cum nepotibus meis filiis fratrum meorum et sororum mearum domno videlicet Stephano Aniciensis ecclesie preposito et ejus fratre Beraldo et domno Hildegario supradicte ecclesie clerico et canonico Beraldo quoque supradicti fratris mei Ebonis filio Wilelmo etiam filio quondam fratris mei Wilelmi honestissimi viri et filiis ejus Geraldo etiam et Rotberto Beraldo Odilone et Hicterio cum consilio sororum nostrarum domine videlicet Blismodis venerabilis abbatisse et Aldegardis secundum seculum nobilissime matrone omnes simul Deo omnipotenti vivo et vero incommutabili et eterno sancte et individue Trinitati Patri et Filio et Spiritui Sancto et beatissime genitrici Dei et Domini nostri semperque virgini Marie et sanctis Angelis et Archangelis et omnibus celestis glorie civibus patriarchis et prophetis et dilectis Domini Johanni Baptiste et Johanni Euvangeliste et beatis apostolis Petro et Paulo ceterisque apostolis et apostolicis viris Innocentibus et omnibus sanctis martyribus confessoribus et virginibus offerimus quasdam res quas parentes nostri jure hereditario possederunt quasdam quas a suis honestissimis senioribus studiosissimo fidelitatis obsequio adquisiverunt Sunt autem ipse res in comitatu et episcopatu Arvernensi In primis supradictus monticulus ut dictum est sinu jam dicti fluminis involutus et ecclesia ex alia parte fluminis in honore sancti martyris Cirici consecrata villula etiam eidem loco proxima que vocatur Forsanguis et unus mansus eidem villule contiguus qui vocatur Plania ecclesia vero in villa Saraziaco et omnis ipsa villa excepto illa parte que in sorte supradicti Wilelmi nepotis nostri venit Est et alia villa supradicte ecclesie proxima que diminutivo nomine Saraziacellus vocatur Hanc enim villulam et supradictum villare qui vocatur Forsanguis domnus et carissimus frater meus Stephanus per cartam donationis ad perfitiendum opus quod pre manibus tenetur vivus adhuc et sospes contulit et ex hac vita discedens reliquid Est et alia villa in ipso comitatu qui vocatur Montaniacus que ex hereditate Golfaldi avunculi nostri ad nos pervenit Sunt et alie due ecclesie non cum duabus sed cum una parrechia consistentes in episcopatu Vallavensi una in honore sancti Johannis Domini precursoris et alia in honore beati Petri apostoli consecrata Et in villa Lisaco eam partem quam Beraldus prepositus et Bertrannus frater ejus visi sunt habere totam ex integro Et in Capilliaco hoc quod domnus Bertrannus habere visus est Hec omnia suprascripta cum omnibus rebus ad se pertinentibus offerimus ut supradictum est Deo omnibus sanctis ejus pro liberatione et ereptione salute et requie supradictorum virorum Beraldi Bertranni Ebonis et Stephani pro quibus hec oblacio specialiter fit et aliorum fratrum suorum Hicterii Eustorgii Wilelmi et Hicterii pro salute quoque patris eorum Beraldi et ejus genitoris Hicterii illustrimorum virorum omniumque parentum consanguineorum et fidelium ipsorum et nostrorum tam vivorum quam defunctorum utriusque sexus etatis et ordinis et eorum qui ad hoc opus perficiendum et custodiendum et stabiliendum nunc consilium et adjutorium prestant et per succedentia tempora prestiterint et omnium fidelium christianorum ut misericordia pietas et gratia Domini nunc et in futuro vel in eternum omnium illorum misereatur et nostri Supradictum locum et omnia que nunc ad ipsum locum pertinere videntur et deinceps per cuncta spatia succedentium temporum a fidelibus christianis in prediis et quibuslibet rebus vel oblationibus eidem loco concessum fuerit sub protectione et tuitione beatorum apostolorum Petri et Pauli et defensione pontificum apostolice sedis et gubernatione abbatis et monachorum Cluniensium constituimus et ab omni servitute et exactione humane improbitatis liberum esse decernimus Ordinamus namque et cum omni desiderio preobtamus ut Clunienses abbates et monachi istum locum teneant semper et possideant et in Dei servitio secundum regulam Sancti Benedicti sicut et cetera monasteria ad se proprie pertinentia ut dictum est ad cultum divine religionis ordinent et disponant Si cui forte hec nostra sanctio sciat profecto dignum nos duxisse ut illius loci sancta congregatio ex nostra paupertate aliquid servitutis habere se recolat propter cujus reverentiam et meritum aliquis ex nostro genere honorem secundum Deum et secundum seculum visus est obtinuisse et parentibus etiam nostris et nobis ipsis non parvos profectus constat evenisse Ceterum si quis adversus testamentum nostre oblationis et donationis aliquam aliquando calumpniam inferre presumpserit contra censuram divini juditii et mundanarum legum jura se fecisse recognoscat Si penitendo emendare voluerit indulgenciam percipiat Si vero emendare noluerit et magis in sua malitia perseverare disposuerit quod petierit non vindicet sed quod meretur percipiet ita ut hic leges pro tali crimine promulgatas persolvat et in eternum penas perpetuas luat Signum domni Odilonis abbatis cujus voto et desiderio hec carta conscripta est S nepotum suorum Stephani videlicet Beraldi alterius Beraldi iterumque tercii Beraldi Aldigerii Wilelmi Odilonis S Petri S Bernardi S Poncii S Dalmacii S Poncii S Blismodis S Aldiardis S Auxilie Facta est autem hec carta anno ab incarnatione Domini millesimo XXV