Charter Document - 02162779
| Charter Number: | 02162779 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1023 |
| Date type: | Internal, A.D., Feast |
| Resource Link(s): |
BnF Département des Manuscrits - NAL 1498 (f15v) CCE: cartae cluniacenses electronicae |
Charter:
Cunctis cruore mediatoris Christi redemptis quadrifidoque orbe diffusis maxima ejusdem Redemptoris nostri patet caritas largifluaque in omnibus benignitas A mundi namque origine inimico instigante mors introivit in homine a qua multis misericordie sue generibus eripere nos dignatus est omnipotentissimus Dominus inserens etiam multorum genera virtutum in suorum pectora fidelium prebens singulis qui ejus divinis optemperant monitis regnum superne visionis sed et seva tormenta inique agentibus reddens in penis infernalibus Nos igitur duo germani fratres Leodegarius et Poncius ea que impiis debentur pertimescentes supplicia considerantesque gaudia que adepturos credimus facientibus ea que sunt salubria abrenunciantes presenti seculo adherere cupimus Deo monasticoque ordini colla submittimus ut in eternum gaudere possimus Cedimus autem pro nostra redemptione cunctorumque parentum nostrorum salute aliquid ex nostra hereditate Domino Deo sanctisque ejus apostolis Petro et Paulo et ad locum qui cognominatur Cluniacum sub tuicione domni Odilonis abbatis constitutum Facimus autem hoc cum consilio cunctorum fratrum nostrorum videlicet domni Feraldi et domni Petri episcoporum atque domni Arnulfi et domni Geraldi domnique Rodulfi atque domni Raimbaldi ut gaudia perpetue vite mereantur adipisci Est autem quoddam castrum vocabulo Altonum cujus partem dimidiam olim a patre nostro Sancto Petro scimus esse derelictam Reliquam vero ejus dimidiam partem que nobis jure paterno advenit Sancto Petro cedimus cum silvis et vineis villis etiam atque pratis aquis aquarumque decursibus omniaque que ad medietatem ipsius castri culta et inculta pertinere videntur Et ut hec donacio firma et stabilis permaneat cuncta que infrascripta continentur ceteris nostris fratribus deveniat De quoddam castro Bar vocabulo cum omnibus que ad eum pertinent quarta pars Item de alio qui vocatur Clarenciagias quarta pars De Guarno autem castro et de quadam villa similiter vocatam Guarnum quarta pars Item de castro Pictavis quarta pars De villa Pupiana quarta pars De villa Fexiana quarta pars De Montilio quarta pars De Frontiniaco vero ea que nostre parti exire videntur similiter dimittimus De Lachias similiter Sed et de quodam castro Mirabellum nomine quem nobis jure paterno scimus provenire quartam partem congregacio Cluniensis quamdiu nobis vita comes fuerit obtinebit post nostrum vero exitum in potestate erit fratrum nostrorum Si quis vero quod minime credimus hanc cartam cum consilio et voluntate cunctorum fratrum nostrorum factam violari presumpserit cunctis maledictionibus que scripte sunt in veteri novoque Testamento subjacebit eritque pars ejus cum impiis qui dixerunt Domino Deo Recede a nobis et cum iniquis omnibus deputatis in tormentis infernalibus pro suis injustis operibus nisi dignos penitentie et congrue satisfactioni fecerit fructus Facta est aut[em] hec carta anno ab incarnatione Domini millesimo XXIII indictione VI feria IIII ante Domini Ascensa in concilio quod fuit apud Sanctum Privatum in territorio Sarrianis castri ubi fuit diversorum episcoporum ceterorumque nobilium utriusque sexus religiosa congregatio regnante piissimo rege Rodulfo Nos igitur duo germani fratres Leodegarius et Poncius manibus propriis hanc cartam firmantes reliquis etiam nostris fratribus propinquis etiam atque nobilibus viris firmandam tradimus suppliciter clementiam Domini implorantes ut cum his sine fine gaudere possimus S Leodegarii et Poncii quorum rogatu et precibus hec carta conscripta est S Feraldi episcopi S Petri episcopi S Arnulfi S Geraldi S Rodulfi S Raimbaldi S Tetbaldi S Petri S Arnulfi S Poncii S Oduini S Sigeranni S Vuitardi S Rostagni