Charter Document - 02162650
| Charter Number: | 02162650 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Lay |
| Charter Type(s): | Grant |
| Date: | 1007 |
| Date type: | Internal, Calendar, Regnal |
| Resource Link(s): |
BnF Département des Manuscrits - NAL 1498 (f12r) TELMA - Traitement électronique des manuscrits et des archives CCE: cartae cluniacenses electronicae |
Charter:
Dum in hujus seculi laborioso certamine vivitur omnibus Christi caractere insignitis valde procurandum est ac sumopere elaborandum ut de terrenis et transitoriis sibi a Deo commissis studeant celestia et eterna mercari sicut divina voce protestante commonemur et exortamur dicentis Facite vobis amicos de Mamona iniquitatis qui vos recipiant in gaudia eterne felicitatis Quod ego Wigo recognoscens in Dei nomine enormitatemque meorum peccaminum reminiscens dono Deo et sanctis ejus apostolis Petro et Paulo ad locum Cluniacum in honore supradictorum apostolorum constructum aliquid de mea hereditate que sita est in pago et episcopatu Viennense hoc est unam ecclesiam in honore sancti Laurentii dedicatam cum omnibus ad ipsam ecclesiam pertinentiis boscum in circuitu et omnia ex omnibus ibi respicientibus Ea conditione ut quamdiu vixero teneam quatuor partes quintam vero partem ex omnibus cellariis scilicet et votis que ibi venerint reddo in presenti Post meum vero obitum ad Sanctum Petrum perveniat totum ad integrum Facio autem hanc donationem pro remedio anime mee avi quoque mei Bernardi et fratris ejus Adalgerii et patris mei Leotardi et filii mei Wilisi omniumque parentum meorum tam vivorum quam defunctorum ut Dominus pro sua pietate sit remissio omnium peccatorum nostrorum in die quando venerit judex vivorum et mortuorum Si autem huic nostre donationi aliquis calumpniari presumpserit anathema sit omnibusque maledictionibus Dei omnipotentis ac sanctorum apostolorum Petri et Pauli et omnium sanctorum subjaceat et quod expetit vindicare non valeat sed insuper coactus judiciaria potestate auri libras X in fisco publico solvat et ut firmior permaneat manu propria firmavi testibusque tradidi roborandam S Wigonis qui fieri firmarique rogavit S Wilisi filii ejus S Amblardi filii Amblardi S Malleni S Raistagni S Almanni S Bernardi S alii Almanni Data per manus Almanni monachi pridie kalendas novembris Cluniaco publice Rodulfo rege regnante anno quinto decimo