Charter Document - 02162485

In nomine sancte et individue Trinitatis Rodbertus divina propitiante clementia serenissimus rex Sicut certum indubitanter est nullam potestatem nisi a Deo prorsus existere sic consequens itaque est ut quisquis ejus dispositione in terrene potestatis culmine sublimatur sub potenti ejusdem largitoris manu sese humiliat eique de suis donis placere studeat Quapropter notum sit omnibus per temporum curricula sibi succedentibus tam regibus videlicet quam comitibus cunctisque magistratuum gradibus vel rei publice ministratoribus quod ad deprecationem Hugonis presulis nostri imperii fidelissimi nostra regali auctoritate concedimus Cluniensi monasterio quoddam cenobium quod Vallis Aurea dicitur situm in Augustudunensi pago consecratum in honore Dei omnipotentis et gloriose Marie virginis ac beati Johannis Christi precursoris Quod cenobium beate memorie comes Lantbertus per cuncta laudandus nullique in suis temporibus in christiana religione secundus ob amorem Dei omnipotentis in proprio construxerat solo cooperante in hoc ipso opere domno Maiolo abbate Qui etiam quandiu rebus humanis interfuit ipsum locum decenter in omnibus adornare curavit quem quasi quodam amoris privilegio pre omnibus dilexit decreverat siquidem jam dictus comes eundem locum liberum esse ab omni cujuspiam loci subjectione ac seculari dominatione ita ut liceret monachis inibi degentibus Deo servire sub proprio pastore ac pro statu totius ecclesie Deo infatigabiliter preces effundere Sed quoniam refrigescente caritate jam jamque in quorumdam cordibus venerabilis Hugo filius ejus alto mentis intuitu perspiciens mundanos casus semper ruituros in deterius simulque considerans supradictum locum in eodem statu quo pater suus decreverat omnino per se stare non posse humiliter adiens nostram excellentiam obnixe deprecatus est ut per preceptum regale regali nihilominus auctoritate jam dictum cenobium Cluniensi monasterio cum omni integritate concederemus Cujus petitionibus faventes cum consilio episcoporum et principum regni nostri auctoritate regali jam dictum cenobium Cluniensi monasterio subdimus cui preest domnus Odilo pastor venerandus et quicquid ad jam dictum locum pertinet precepto regali firmamus et ratum ducimus cum omnibus ad se pertinentibus ecclesiis scilicet villulis vineis campis terris pratis silvis aquis aquarumque decursibus majoribus et rivis minoribus cum exitibus et regressibus cum pascuis et omnibus adjacentiis seu omnibus servis et ancillis vel colonis cum infantibus suis et omni cognatione eorum totum ad integrum cedimus atque transfundimus beatis apostolis Petro et Paulo et Cluniensi monasterio pro statu et incolomitate regni nostri simul et principum nostrorum atque omnium Christi fidelium vivorum scilicet ac defunctorum Precipientes ergo jubemus ut deinceps per hanc nostre sublimitatis auctoritatem jure firmissimo predicti seculi judices beati videlicet Petrus et Paulus et domnus abba Odilo suique successores seu jam prefati cenobii rectores vel monachi inibi Deo servientes teneant ordinent et possideant et liberum in omnibus potiantur arbitrium ordinandi quicquid eligerint secundum regulam Sancti Benedicti Et ut hec nostre celsitudinis auctoritas firmior habeatur et per ventura tempora melius conservetur de anulo nostro subter sigillari jussimus