Charter Document - 02162050

Noverint omnes fideles Christi precipue Sancti Petri Cluniacensis monachi tam presentes quam futuri quod quidam clericus Ugo nomine petierit a domno Ebrado loci Taherniacensis curam tenenti quatinus a domno abbate Odilone domno etiam Vuarnerio priore et ab aliis senioribus posceret dari sibi quandam vineam jam dudum a quodam avunculo suo clerico possessam qui ejus precibus adquiescens per consilium Taindradi et Vuichardi militum aliorum [etiam] Sancti Petri fidelium rem dictam domno abbati patefecit qui et ipse ita fieri jussit tali scilicet ratione ut per singulos annos per quos istam vineam que Brocinis vocatur possederit fratribus Cluniaco Deo servientibus LX pisces qui vulgo lampredi vocantur tam pro hoc beneficio quam pro peccatorum suorum remedio aut ipse deferat aut certe per fidelem nuncium kalendas maii Cluniaco transmittat Quod si omnino invenire non potuerit decem solidos pro ipsis persolvat ipse etiam fructus qui de vinea collectus fuerit et ex aliis rebus ejusdem clerici tantum quod centum et amplius solidis valeat in domo que est Vienne Sancti Petri ac seniorum Cluniaco morantium reponantur ac post ipsius obitum teneant ac possideant et insuper ipse clericus in servicio seniorum jugiter promptus ac paratus existat Quod si huic conventioni ipse clericus aliquam occasionem apposuerit [quod absit] scilicet ut supranominatum servitium sponte ac cum bona voluntate ex integro persolvere nolit seniores recipiant vineam suam sine ipsius vel alicujus malivolentia S Ugonis qui hoc memoriale scribere jussit