Charter Document - 02161984
| Charter Number: | 02161984 |
|---|---|
| Cartulary Title: | Recueil des Chartes de l'Abbaye de Cluny |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 0993 - 0994 |
| Date type: | Assigned |
| Resource Link(s): |
BnF Département des Manuscrits - NAL 1498 (f12r) CCE: cartae cluniacenses electronicae |
Charter:
Unicuique mortalium pro salute anime rationabiliter tractare omnibus est necessarium Deo etiam indubitanter acceptum Quapropter ego in Dei nomine Hugo Genevensis ecclesie presul peccatorum meorum obliterationem Deo annuente promereri desiderans sepe mecum tacitus frequenter etiam cum seniore Rodulfo ceterisque amicis tractare disposui qua ratione loca nostra diocesi posita et ad nostre sedis locum pertinentia in meliorem statum repararentur nostra industria et eorum protectione assidua Hec autem sepissime pertractante accidit ut bone memorie Adalheid imperatrix augusta nostri pontificatus urbem ingressa ecclesiam beatissimi Victoris martyris Christi orandi gratia intraret Que omnibus propter que venerat rite peractis eundem locum monastice discipline religioni congruum fore prospexit et ut id omnino peragerem consilium dedit Non multo post tempore ejusdem beati martyris membra invenire nos contigit argenteo loculo diligentissime recondita que actenus per plurima tempora hominum aspectibus fuerant occultata His autem sanctissimis membris ab humo qua diu latuerant cautissime levatis et strenuissime ut oportebat procuratis in festivitate ipsius martyris seniore nostro rege Ruodulfo domna quoque regina Egildrude maximo etiam conventu episcoporum comitum et aliorum religiosorum et nobilium virorum congregato communi consilio statuimus eadem prefati martyris membra sub ara ipsius basilice esse locanda Cum ergo ceptum opus devota mente complevisse mus cogitare mecum cepi frequentius ut predictum locum amplificare in melius statuendo scilicet in melius illuc monastice religionis viros qui eundem locum religiosis exornarent cultibus et suo ordini congruis circum struerent habitaculis Qui vero in eodem loco non erat tanta facultas possessionis ut aliquis ibi potuisset ordinari loco abbatis memorandum Cluniensis cenobii abbatem Odilonem ad hoc peragendum evocavi et permissione domni Rodulfi regis consensu etiam fratris ejus Burghardi Lucdunensis archiepiscopi ceterorumque comitum et nobilium virorum hortatu predictum locum sancti martyris Victoris ejus ordinacioni commisi ut ipse suique successores prelibatum locum prout potuerint in melius studeant reparare et nostrorum successorum auctoritate deinceps in perpetuum possideant Hanc autem constitutionem non ideo statuimus ut a potestate nostre ecclesie aliquid [quod absit] subtrahere velimus sed tali hoc gerimus dispositione ut predictus locus in perpetua valeat manere religione et inter nostros successores Cluniensisque cenobii abbates caritas excellentissima firmetur et apud illos nostri memoria specialiter observetur Successorum preterea nostrorum hortor et obsecro sincerissimam caritatem nostram dignentur sua confirmatione stabilire devocionem quam statuere cupio propter salutem animarum nostrorum successorum nobisque succedencium pro remedio anime mee et seniorum nostrorum R regis et Chuonradi regis pro stabilitate quoque ecclesie nobis a Deo commisse concedendo scilicet Cluniensis cenobii rectoribus omni reliquo tempore ordinationem prelibati loci Victoris martyris Christi ut in eodem loco memoria et religio perpetualiter valeat observari et ipsi de consorcio religiosorum virorum diutius possint gratulari