Charter Document - 02151537

Euvangelicis instruimur documentis ut Dominum Deum tota virtute diligamus et proximos tanquam nos ipsos amemus et si ipsos vere diligimus eorum necessitatibus compati in quantum possumus amore superni judicis debemus illius Samaritani reminiscentes qui vulnerato fratri in via opera misericordie exibuit mente benigna unde et ecclesiam Dei proximorum collectione congregatam pro virium capacitate subvenire debemus ut ex nostra portione in aliquo ditata supere beatitatis mercedem ab ejusdem sponso ecclesie quandoque mereamur percipere Quapropter auxiliante in perpetuum Domino nostro Jesu Christo Rodulfus sancte Cabilonensis ecclesie presul omnibus ortodoxe fidei pie famulantibus maxime filiis ac fidelibus presentibus scilicet ac futuris notum esse desideramus qualiter Ageno archidiaconus noster adiit nostre munificentie serenitatem in dubio vite adhuc lacrimabiliter languens trahens sub ingenti dolore longa suspiria quantis potuit precibus deprecans quo perpetuale donum scriptum et testamentum concederemus domno Maiolo abbati et fratribus Cluniensi cenobio degentibus ex area et mansione supraposita quam ipse proprio sumptu et facultate construxit ubi ipse adhuc degere videtur Est vero sita infra muros Cavillonice civitatis conjacens in claustra canonicorum martiris Christi Vincentii quam ab una parte claudit statio mansionaria Oidelonis canonici ab alia Euvardi et ab alia publici itineris semita clauditur vero a quarta ipso supradicte civitatis murorum agmine non modico Ad augendum enim sperate retributionis palmarium pio rogavit oratu quo canonicam quam ipse ab ineunte etate pro sustentatione diaria sicut ceteri fratres ab ecclesia matre possedit prefato abbati et pretaxatis fratribus sub hujus auctoritate testamenti in perpetuum traderemus Nos vero predicti abbatis personam ad memoriam reducentes hanc postulationem absque aliqua tarditate dignum duximus adimplere maxime cum tanti viri gloriam ab ipso Domino mutuatam et aure percipimus et intuitu proprii luminis nichil in ejus dilectione coniventes cotidie perspicimus ille enim ut vere est Galliarum jubar ad tempus exortum nostris seculis admirandum et si potis est omnibus imitandum jussimus denique illi et dilectissimis fratribus sibi commissis presentibus atque futuris tale tradere scriptum ut nostri loci jam dictam canonicam et aream determinatam cum suprapositum edificium eternaliter habeant perpetuo possideant et absque aliqua inquietudine teneant Si quis vero contra hoc decretum a nobis nostrorum consensu fratrum solempniter promulgatum venerit et injuriam calumniantis miserie inferre voluerit nisi resipuerit auctoritate Patris et Filii et Spiritus Sancti excommunicatus dispereat et nostri anathematis vinculo innodetur Unde et manu propria subscripsimus et pontificali auctoritate corroboravimus S Rodulfi humilis presuli Sancti Vincentii S Adalaidis comitisse humilis et Hugonis filii ejus S Rotberti vicecomitis S Lanberti clerici S Frogerii decani S Hildradi levite Gondrannus indignus sacerdos firmavit Hildebertus sacerdos Gislebertus levita Gyso levita Frodgarius subdiaconus Bertardus levita Bertardus sacerdos Wichardus levita Euvardus subdiaconus Hugo subdiaconus S Odonis militis S Addoni archidiaconi Ego Warulfus levita scripsi et subscripsi dictavi ad vicem Otberti archidiaconi pridie kalendas decembris die martis anno XXVI regnante Lothario rege