Charter Document - 02151247

Ioannes Episcopus servus servorum Dei fratribus et Coepiscopis per urbes Galliarum consistentibus et presidentibus Hicterio scilicet Arelatensi Amblardo Lugdunensi Teuthbaldo Viennensi Stephano Claromontensi Aimoni Valentinensi Widoni Vesontionensi Adoni Matisconensi Frotgario Cabilonensi Widoni Vallaviensi Landrico Avenionensi Geraldo Genevensi Magnerio Lausanensi Luboino Lurensi Rostagno Vivariensi Apostolice gratiam benedictionis et gloriam eterne beatitudinis Letamur valde in Domino et exultamus quod dilectio Dei et charitas proximi quam vos studiosissime multorum relatione audivimus custodire ad vias Domini et mandata facit vos subtiliter anhelare ut Pontificatus vestri discretum regimen multis sancte Ecclesie filiis necessarium prestet levamen Quod manifestis probationibus vos semper facere desideramus pie et commonemus ut virtutum pennis ad celestia convolantes plures ad Christum populos trahere post vos possitis Nostrum namque est vos hortari ne Domini disciplinam per quam pervenitur ad gloriam parvipendatis aut negligere velitis Quoniam vos estis ut ait Dominus lux mundi et sal terre quibus commisit Dominus Jesus Christus Ecclesiam suam regendam quam acquisivit sanguine suo Notum itaque vobis facimus dilectissimi quod latior et amplior specialissime nobis est charitas circa Monasterium Cluniense cui sapienter et beate preest charissimus filius noster Domnus Majolus Abbas vobis ut credimus bene notus utpote vir Religiosus quem vobis attentius et diligentius cum Monasteriis omnibus que ejus sunt subjecta regimini commendo vestramque beatitudinem precor quod Dei amore ac veneratione beati Petri Apostolorum Principis nostre quoque dilectionis affectu protectores sitis Cenobiorum sibi commissorum Nostra insuper auctoritate beati Petri vice fulta et roborata Dei omnipotentis disponente gratia vos commonefacio ut quicumque potens vel persona alicujus momenti preeminens res seu possessiones jam dictorum locorum pervadere ausu nefario tentaverit censuram vestre excommunicationis districtissimam mox ut cognoveritis irrevocabiliter et acrius incurrat et a Conventu fidelium segregetur per vestram necne testificationem satis formidabilem vinculo nostre excommunicationis se noverit colligatum donec satisfactione congrua resipiscat et predicti Monasterii Patri Majolo humilitatem exhibeat veniam postulando et consequendo Denique vos adjuro sub invocatione sanctissime et individue Trinitatis atque auctoritate Apostolica enixius precipio et ut fratres charissimos rogo non licere vobis preterire hoc nostri pondus precepti quod et sancte Ecclesie exaltatio et vestra ad eterna bona est provectio Te etiam frater et Coepiscope Stephane in Domino alloquor pro insita bonitate tibi ut compellas Amblardum fidelem tuum Celsinianensi Cenobio propriam terram quam hactenus eidem substraxit monasterio ut tuo judicio correctus ligamini terribilis excommunicationis et penas eterne damnationis evadere possit quoniam si non resipuerit interminabili anathemate ferietur Res quoque exigit ut tibi aliqua dicamus frater charissime et amande Domine Ado Episcope quem licet non viderimus ex nomine novimus in omni spirituali bonitate Efflagitamus itaque benignissimam tue paternitatis dulcedinem ut quo vicinior esse videris prefati Monasterii Schole eo tua protectio pro tuo posse celerior fratrum necessitatibus occurrat qui te ex abundanti charitate diligunt et ulnis totius amoris perfectissime ambiunt et amplecti desiderant Quocirca Cluniensis Monasterii semper esto protector sicut beati Petri es fidelis amator