Charter Document - 02130108
| Charter Number: | 02130108 |
|---|---|
| Cartulary Title: | Cartulaire du Prieuré de Saint-Marcel-lès-Chalon |
| Charter Language: | Latin |
| Charter Origin: | Religious |
| Charter Type(s): | Renunciation |
| Date: | 1093 |
| Date type: | Assigned |
| Resource Link(s): |
|
Charter:
Notum sit cunctis tam presentibus quam futuris huius sancte ecclesie filiis quod inter multos multarum possessionum Sancti Marcelli iniustos peruasores quidam miles extiterit nomine Bonefatius huiusmodi lucris iniquis adeo intentus ut suo in tempore non paruum ecclesie Sancti Marcelli intulerit dampnum Pro qua re commotus eiusdem loci prepositus nomine Geraldus curiam comitum Cabilonensium Guidonis scilicet et Gaufredi sepius adiit ibique super hac re querelas suas exposuit Cuius incitati clamoribus idem comites et tantam Sancti Marcelli iniuriam non ferentes eundem militem ad curiam suam conuocauerunt presentieque sue astare iusserunt Vbi tandem de his omnibus auditus racionabiliter que conuictus aliqua que per uiolentiam nitebatur auferre in presentia comitum et tocius curie uuerpiuit atque finiuit elemosinam uidelicet quam frater ipsius Petrus Carbonellus Deo omnipotenti et Sancto Marcello contulerat scilicet quicquid iure hereditario habebat uel possidebat in uilla que dicitur Siluiniaca et in cunctis que in eadem uilla tenere uidebatur Mansum quoque Duranni cum omnibus appenditiis suis in uilla que uocatur Poysolus et ipsum Durannum cum infantibus suis quem isdem Petrus Carbonellus predicto fratri suo Bonefacio tali tenore dimiserat ut si in partibus Hierosolimomm quo pergere cupiebat eisdem Petrus uel moreretur uel remaneret eundem Durannum sicut et cetera predictus martir absque ulla calumpnia imperpetuum possideret Clausum etiam qui est in uilla que dicitur Varennas Terram quoque que est in uilla que dicitur Esparuens Hec omnia iamdictus Bonefatius in presentia comitum et totius curie uuerpiuit atque finiuit Insuper etiam de his omnibus super altare Sancti Marcelli astante sacerdote et sancta celebrante misteria cum missali quo missa celebrabatur donum fecit coram uiuificis sacramentis corporis et sanguinis Domini et ut istud donum firmum atque stabilitum perpetuo maneret iam dictum prepositum osculatus est Huius rei testes sunt ipsi comites et cuncti qui aderant Hugo etiam de Baies Salicherius miles Gaufredus de Milei Falco de Reun Iocerannus de Martiliaco Siguinus de Preanblen Petrus Gunbadus Wido de Verdun