Charter Document - 02130078
| Charter Number: | 02130078 |
|---|---|
| Cartulary Title: | Cartulaire du Prieuré de Saint-Marcel-lès-Chalon |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1114 |
| Date type: | Internal, A.D., Calendar |
| Resource Link(s): |
|
Charter:
Omnibus in unitate fidei uiuentibus Christique misericordiam prestolantibus et uerbi Dei pabulo mentis sue archana alentibus sermo intonat diuinus quod ita dispensatio redemptoris quibusque consulit ditibus ut ex propriis rebus quas transitorie possident centuplicatum ualeant adquirere fenus si modo eisdem bene utendo rebus ea que habent studeant erogare pauperibus et quoniam ut ait apostolus Non habemus hic manentem ciuitatem diesque nostri tamquam umbra preteriens cotidie euanescunt et uoce ueritatis luce clarius constat omnem arborem que non facit fructum bonum excidi et in ignem mitti oportet maxime nos qui pre ceteris prelati uidemus ut dum in hoc corpore sumus aliquid ex his que ad Dei cultum pertinent eo adiuuante operemur quatinus in futuro eterne retributionis participes existere mereamur Quapropter ego Dei gratia Walterius Cabilonensium episcopus peccatorum meorum ueniam et diuine pietatis misericordiam consequi desiderans dono et concedo Deo et sanctis apostolis eius Petro et Paulo ad locum Sancti Marcelli martiris Cabilonensis cui preest domnus Hugo cognomento Beraldi monachus Sancti Petri Cluniacensis ad cuius ordinationem idem locus spectare uidetur et fratribus in eodem loco Deo seruientibus ecclesiam de Boens cum omnibus ad se pertinentibus uidelicet terris pratis siluis aquis ea conditione ut ipsi in perpetuum habeant teneant et possideant ac pro nobis Christi exorent clementiam Et que eadem ecclesia pertinens et subiecta ecclesie Sancti Vincentii Cabilonensis uidebatur in capitulo generali ipso die inuentionis Sancti Vincentii cum consilio et uoluntate canonicorum eiusdem ecclesie domni uidelicet Iotsaldi decani Hugonis cantoris Ansedei archidiaconi Hugonis de Nuliaco Rotberti de Milmanda Raimundi de Bussiaco Rodulfi Siguini Stephani Bruni archipresbiteri et ceterorum qui adfuerant maiorum siue minorum Hoc donum factum est atque confirmatum dono mei anuli in manu predicti prioris Quoniam igitur a memoria scito labitur quod non scito scripture traditur ad munimentum possidentium contraque querelas inuidentium hanc cartam fieri uolumus atque mandauimus nostraque auctoritate corroborauimus Factum est igitur hoc donum in Cabilonensi ciuitate in capitulo canonicorum mense Septembro viiii kalendas Octobris anno ab incarnatione Domini Millesimo CXIIII epacta xxiii Ludouico rege Francorum regnante