Charter Document - 02130058
| Charter Number: | 02130058 |
|---|---|
| Cartulary Title: | Cartulaire du Prieuré de Saint-Marcel-lès-Chalon |
| Charter Language: | Latin |
| Charter Origin: | Religious |
| Charter Type(s): | Grant |
| Date: | 1075 |
| Date type: | Internal, A.D. |
| Resource Link(s): |
|
Charter:
Cunctator totius bonitatis doctor uniuerse pie religionis saluti omnium exemplum prebuit passionis formam docuit confessionis suis sequacibus studium sancte proposuit operationis quatinus aut constanter faciendo aut catholice confitendo aut uiriliter operando salus post uite cursum hec omnibus operantibus proueniret in eternum Ad cuius quoque desiderium nonnulli pertingere cupientes sibi suisque renuntiantes colla leuissimo Christi iugo submiserunt et sua pauperibus Christi deuotissime contulerunt Quorum participes ego Willelmus et Rainaldus frater meus fieri cupientes quicquid paterne hereditatis nobis a parentibus dimissum est Deo et ecclesie Beati Marcelli martiris precipui in suburbio Cabilonensis urbis site contulimus nos inibi habitum sancte religionis super capita ponentes quatinus interuentu piissimi martiris uite post laborem uitam obtineamus sempiternam Adiacet autem hec ereditas in uilla que uocatur Marniaco Pratum quod dicitur de Porta et mansum de Loia et uineam Tetmauri et mansum Martini cum omnibus appenditiis eius Et in uilla Chasapot pratum usum et pratum Arberti et pratum in quo fons scaturrit et campos et quicquid nostre hereditatis uidetur pertinere in supradicta uilla Hec omnia nobiscum dedimus beatis apostolis Petro et Paulo supradictoque martiri et ipsius loci priori Aluiso et omnibus fratribus ibi in perpetuum Deo seruientibus In primis laudem prebente matre nostra Acherada et fratribus nostris Wigone Hithmaro Heinrico Milone Et quisquis hec calumniare uoluerit excommunicatus in perpetuum maneat Actum publice apud Sanctum Marcellum regnante Philippo rege anno ab incarnatione Domini MLXXV indictione xiii epacta i concurrente iii