Charter Document - 02120158

Universis presentes literas inspecturis frater Valentinus humilis prior de Charitate salutem in Domino sempiternam Cum secundum statuta et ordinationes antiquas hujus monasterii ad observantiam religionis et ad repellandas derisiones tumultus et garrulationes tenentes et regentes conventum debeant et teneantur ascendere dormitorium ante matutinas et post et etiam in dormitionibus que fiunt tempore meridianarum et cerchiam personaliter facere dictas ordinationes tanquam consonantes rationi ratificamus et approbamus et observari precipimus Et ad removendum quemdam abusum qui de novo involuit per aliquos regentes conventum qui paulatim et pluribus vicibus relinquebant dormitorium extra jacendo adjiciendo ordinamus et statuimus quod si contingat talem regentem et tenentem conventum relinquere dormitorium et negligere cerchiam facere horis predictis vel aliqua ex illis horis postea per unam diem integram non se intromittat regere nec tenere conventum imo significet hoc alteri domno ordinis ipsum immediate subsequenti ut teneat et regat conventum die autem integra elapsa intrare poterit et regere conventum juxta consuetudinem antiquam intrando horam prius vel capitulum et ab illo tempore quo dormitorium reliquerit usque post diem integram a conventu debite resumpto inhibemus eis ne de regimine conventus aliqualiter se intromittant et etiam inhibemus omnibus religiosis nobis subditis ne eidem ut tenenti et regenti conventum in aliquo obediant imo hoc tempore durante alteri domno ordinis ipsum immediate sequenti obediant antiquis tamen consuetudinibus hujus monasterii de jacendo extra monasterium et de resumendo conventum ante et post infirmarius regulares quotidianas et flobotomias in suo robore duraturis Nolumus tamen hanc constitutionem extendi ad casus inopinatos necessarios in statu hujus monasterii seu persone talis regentis conventum nec etiam tamen invocationem istam seu additionem non intendimus extendi ad illos qui cum licentia superioris vel suorum majorum causa negociationis ibunt extra villam de Charitate in quibus volumus quod sufficiat observantia antique consuetudinis Item cum circuitus pene et labores sint evitandi ordinamus quod quando fiunt potationes et dispersiones vini in loco dicto [supra caveam] domnus vini stet et sedeat hora prandii juxta fenestram per quam ministratur vinum de cavea in refectorio Item ut honestius reficiantur religiosi in refectorio et ne seculares incedentes per claustrum coram hostio refectorii horis quibus ibi fit refectio videant infra refectorium ordinamus quod refectorarius semper teneat hostium refectorii clausum cum cliqueto et religiosi intrantes vel excuntes refectorium dictum hostium claudant alias corrigantur potissime refectorarius Item ad removendas garrulationes et discursus laicorum qui fiunt in refectorio in refectione servitorum in mensa contigua hostio in qua consueverunt religiosorum servitores refici ordinamus quod a cetero dicti religiosorum servitores sedeant et reficiantur in mensa que est a parte chori prioris Item quia aliquando tempore infirmariarum regularium propter paucum numerum religiosorum unica mappa ponitur que etiam ponitur a parte chori abbatis et communiter sedent religiosi prope ostium ubi fiunt plures derisiones nolentes superius ascendere et judices sunt in hoc negligentes ordinamus quod quotiescunque illa sola mappa ponitur ponatur in mensa que est a parte chori prioris et in illa reficiantur religiosi Item ut honestius preparentur et ministrentur cibaria religiosis et ne laici edentes carnes videant cibaria religiosorum et ne servitores religiosi habeant materiam discurendi per monasterium et excundi refectorium et ut refectorium melius teneatur clausum ordinamus quod tempore quo religiosi reficiantur in refectorio claudatur coquina cum clave communi quam tenet regens conventum in qua coquina solum includantur duo famuli coquine et claudatur dictum ostium coquine antequam dicatur benedicite quod non aperiatur donec cerchia facta fuerit in refectorium in refectione servitorum et ut servitores religiosi necessarii ad intrandum coquinam melius possint vacare suo officio absque hoc quod exeant refectorium et ne ostium coquine pro exitu ipsorum aperiatur ordinamus quod fiat ostium in refectorio intrando coquinam in loco ubi est una fenestra prope armaria furni de quo ostio regens conventum solus clavem habeat quod ostium semper sit clausum nisi solum tempore quo magnum ostium coquine erit clausum videlicet a tempore de benedicite usque post cerchiam refectionis servitorum Actum in nostro capitulo die decima mensis julii anno Domini millesimo quadringentesimo decimo sexto Sic signatum G Valent