Charter Document - 02120153

Nous frère Jehan de Vinzelles maistre en théologie humble prieur de La Charité sur Loyre reconnaissons et affirmons par ces presentes que nonobstant quelquonque bail ferme ou accensement qui ont esté faictes le temps passé à quelquonque personne pour et au nom de nous des trois moulins assis près de nostre ville de La Charité au rez de la porte de La Marche neantmoins lesditz moulins avec les moutures et esmolumens d'iceux sont et appartiennent a nostre couvent de La Charité lequel nostre couvent a permis consenty et voulu que nos facteurs boursier et maistres d'hostel ont reçeu et levé par aucun temps les moutures et esmolumens des trois moulins dessusditz pour consideration de la chèreté du bled qui a courru et courre encores dont nous remercions audit nostre couvent lequel bled dessusdit a esté converty et applicqué au vivre et à la subsistance d'iceluy nostre couvent et de nostre hostel de La Charité Et en outre nous dessusdit prieur remettons et transportons paisiblement et quittement à nostre couvent dessusdit tout le droit qui nous pourroit appartenir a cause de dom Thomas de Losche jadis nostre aumosnier et maistre d'hostel de La Charité qui en son vivant estoit participant et personnier en certaine ferme et amodiation desdits moulins En tesmoing de ce nous avons fait sceller de nostre seel ces presentes et les avons signées de nostre sein manuel Donné à La Charité le premier jour d'aoust l'an mil quatre cent vingt six Signé Johannes prior Caritatensis