Charter Document - 02120142

Nos Ludovicus de Trasetis supprior et eleemosinarius ecclesie beate Marie de Charitate Cluniacensis ordinis Autissiodorensis diocesis universis presentes literas inspecturis salutem in Domino Quoniam vacantibus duabus capellaniis aut altera earum fundatis in ecclesia beate Marie de Charitate in altari beati Jacobi juxta sepulchrum ad honorem beatorum Joannis Baptiste et evangeliste dispositio et collatio habito consilio illorum de ordine cellerarii bursarii infirmarii et sacriste ad nos pleno jure dignoscitur pertinere Igitur attendentes proventus et exitus dictarum capellaniarum nunc pertinentes esse debiles tenuos et exiles ad sustentationem duorum capellanorum immo vix ad sustentationem unius capellanie Idcirco de predictorum religiosorum consilio ad honorem Dei et ad divinum officium per unum capellanum commodius exequendum secundam capellaniam tam de facto quam jure nunc vacantem prime capellanie annectimus et unimus et cum prima capellania pro quatuor secunda vero pro tribus missis essent fundate ob remedium animarum fundatorum celebrandis et sic operteret dictum capellanum quotidie celebrare quod esset nimis grave onerosum et forte periculosum cum in sacris canonibus reperiatur esse cautum quod felix est qui digne unam missam potest celebrare Idcirco habito respectu ad emolumenta et onera dictarum capellaniarum dictas capellanias sic per nos unitas de duabus missis exoneramus et ipsas capellanias sic unitas et quemlibet possessorem earum a dictis duabus missis liberamus fundationem seu dotem illarum capellaniarum nomine fundatorum et pro ipsis taliter volumus et ordinamus quod capellanus modernus et omnes sui successores qui pro tempore erunt quinque missas videlicet tres pro prima duas pro secunda fundatoribus earumdem diebus et ordinatione inferius annotatis videlicet die dominica de sancto Joanne Baptista diebus lune mercurii et veneris pro defunctis et die sabbati de sancto Joanne evangelista ad altare beati Jacobi juxta sepulchrum predictum singulis hebdomadis bona fide per se vel per alium tenebuntur celebrare secundum ordinationem et statutum contentas in litteris de et super fundatione predictarum capellaniarum confectis et ad dictas quinque missas ad predictum altare qualibet hebdomada celebrandas capellanum modernum et ejus successores qui pro tempore erunt astringimus et etiam obligamus hoc acto et ordinato non obstante ordinatione seu unione premissis quod in casu in quo contingeret fructus seu redditus ipsarum capellaniarum sufficerent seu competerent seu alia causa videlicet donatione largitione legatis aut augmentatione ad celebrandum alias duas missas secundum quod nobis videretur faciendum ac etiam ordinandum Datum sub sigillo nostro proprio sexta decima die mensis maii anno Domini millesimo trecentesimo quinquagesimo secundo